Oznur Deger-Buşra Turan

 

WAN - Welatijê Wanî reaksîyon vera meaşê asgarî yê ke sey 28 hezar û 78 TL ame eşkerakerdiş mojnayî û vatî: “Cuye zehmet a. Merdiman dir keyf nêmendo. Her kes têkoşînê cuyayîşî dano. Keda merdiman yena binpaykerdiş. Ez venga hukmatî kena; wa aşmêke bi meaşê asgarî debara xo bikerê. Dima do rewşa ma fam bikerê.”

 

Krîzê ekonomî ke her şino giran beno meaşê asgarî yê serra 2026ine 23ê Kanûne de hetê wezîrê kar û asayîşê cimatî Vedat Işikhanî ra sey 28 hezar û 75 ame eşkerakerdiş. Goreyê raporê Konfederasyonê Sendîkayanê Karkeran ê Tirkîya (TURK-ÎŞ) sînorê vêşanbîyayîşê keyeyêko çar merdiman pê yeno 30 hezar û 143 o û sînorê feqîrîye zî sey 98 hezar û 188 ame eşkerakerdiş.

 

Sereka Pêroyî ya Konfederasyonê Sendîkayanê Karkeran ê Şorişgêr (DÎSK) Arzu Çerkezoglu zî da zanayîş ke ganî meaşê asgarî yê 2026ine brut 58 hezar û 273 TL bîyayîne.

 

Cinîyê Wanî derheqê meaşê asgarî de qisey kerdî û dîyar kerdî ke bi nê pereyî debare mumkin nîya.

 

Şar vêşan o

 

Nurfîcan Guzel: Ma nêeşkenê debara xo bikerê. Ê ke meaşê asgarî gênê nêeşkenê yew fatûreyê xo bidê. Pereyê ma gênê şino fatûreyan rê. Şar vêşan o. Zam yeno meaşê asgarî, labelê heto bîn ra her çî yeno vaykerdiş. Wa meaşê asgarî 30-40 hezar bo, o zî qîm nêkeno. 60-70 hezar bo zî qîm nêkeno.”

 

‘Merdimî yenê binpaykerdiş’

 

Welatija ke nêwaşt nameyê xo bido wina va: “Meaşê Asgarî zaf kêmî yo. Ma nêeşkenê hewcedarîyê xo bigîrê. Enflasyon berz o. Merdimî yenê binpaykerdiş. Ma nêeşkenê waştişê tutanê xo bigîrê. Yew bigîrê nêeşkenê yê bînî bigîrê. Kira vay a. Ganî meaşê asgarî 50 hezar bibayîne.”

 

‘Ganî ma serekkomar ra bipersê’

 

Emîne Kaya: “Meaşê asgarî kêmî yo. Ganî hîna zêde bibayîne. Merdimî nêeşkenê debara xo bikerê. Her çî vay o. Ganî 35-40 hezar bibayîne. Ê ke kira de yê nêeşkenê bi nê debara xo bikerê. Pereyê ke yeno şino awe û ceyranî rê. Ganî çareserîya nê serokkomarî ra bêro perskerdiş.”

 

‘Wa hukmat bi meaşê asgarî debara xo bikero’

 

Yeter Bozkurt: “Ez zî bi meaşê asgarî xebitîyena. Bi nê pereyî debara mumkin nîya. Çi heyf şertê ma ci de yê her kes vîneno. Ez venga hukmatî kena. Wa aşmêke bi meaşê asgarî debara xo bikerê. Dima do ma fam bikerê. Pereyê ke ma ra yenê birnayene her serre qesre rê yenê xerckerdiş. Merdim nêeşkeno kîloyêk goşt bigîro. Ganî meaşê 40-50 hezar bibayîne.”

 

‘Ez şina pakitîya keyeyan’

 

Asiye Şikli: “Debare zehmet a. Ez nêeşkena çîyêk weş semedê meaşê asgarî vajî. Senîn zam yeno meaşê asgarî her çî vay beno. Ez kira de ya. Di tutê ma est ê. Mêrdeyê mi nêweş o. Ma zaf zehmetîyan ancenê. Tu ameyoxê ma çin o. Ez şina pakitîya keyeyan. Pereyê mi zî tena semedê xidayan qîm keno. Wa rewşe tay baş bikerê ke şar debara xo bikero.”

 

Saadet Abali: Ma 8 merdimî yê. Mêrdeyê mi tena xebitîyeno. Ma nêeşkenê debara xo bikerê. Zimistanê şertê Wanî zehmet ê. Şar xebitîyeno. Ganî hîn meaşê asgarî zêde bibo. Cuye vay a.”

 

Songul Gul: “Bi meaşê asgarî debara mumkin nîya. O pere qîm nêkeno. Ganî tewr tay 35 hezar bibayîne.”

 

‘Her kes têkoşînê cuyayîşî dano’

 

Nafîye Okur zî nê çî ard ziwan: “Merdimî ewnîyenê û çîyêk nêgênê. Cuye zehmet a. Merdiman dir keyf nêmendo. Her kes têkoşînê cuyayîşî dano. Meaşê asgarî qîm nêkeno. Qîmê kira zî nêkeno. Kira nika 25 hezar a. Meaşê asgarî qîmê tu çîyêk nêkeno.”