ŞIRNEX - Taybet Înan û 29 merdimê bînî ê ke qedexeyê vecîyayîşê teberî yê Sîlopiya de ameyî qetilkerdiş, bi eşkerayî û zîyaretan ameyî yadkerdiş.

 

14ê Kanûna 2015ine de qezaya Sîlopiya ya Şirnexî de qedexeyê vecîyayîşê kuçeyan ame neqlkerdiş û 35 rojî dewam kerd. Demê qedexeyî de Dayîka Taybet Înan verê berê keyeyê xo de ameye qetilkerdiş û hewteyêk destur nêame dayîş ke cenazeya aye erd ra bêro wedaritiş. Taybet Înan û 29 merdimê bînî ê ke ddemê qedexeyî de ameyî qetilkerdiş, ameyî yadkerdiş. Yadkerdiş, cayo ke Taybet Înan uca de amebî qetilkerdiş de ame kerdiş. Temsîlkarê partîyanê sîyasîyan, komeleyanê cimatê sîvîlî û zaf welatijî tewrê yadkerdişî bîyî. Girseyo ke kuçeyêk nêzdîyê cayê qetilkerdişê Taybet Înan de kom bî, pêwa astengkerdişê polîsan zî verê xo dayî cayê yadkerdişî û rayîrşîyayîş kerdî. Rayîrşîyayîşî de fotografê Taybet Înane ame berzkerdiş û sloganê “Şehîd namirin” ameyî berzkerdiş.

 

Yadkerdiş bi deqeyêk rêzgirewtişî dest pêkerd. Dima ra zî nameyê Têgêrayîşê Cinîyan ê Azadan (TJA) ser o Çîmen Fîdan qisey kerd. Çîmen Fîdan qirkerdişê 10 serranê verênî yad kerd û va: “Dayîka Taybet, 10 serrî verê nê kuçeyî de 7 rojî erd de mende. Nê ser o 10 serrî derbas bî labelê hema zî hewl danê yadkerdişê aye asteng bikerê. Ser o se serrî zî derbas bibo ma nê wehşetî xo vîr ra nêkenê. No wehşet sucê hemverê merdimîye yo. Heta ke qatilî tepişte nêbê têkoşînê ma dewam keno. Heta ke ma xeyalanê înan ca nîyarê têkoşînê ma dewam keno.”

 

Kênaya Taybet Înane Halîme Akin yadkerdiş de qisey kerd û sipasîya her kesî kerd ke Taybet Înan xo vîr ra nêkerdê. Halîme Akin va: “Heta merdişî zî ma do xo vîr ra nêkerê.”

 

Tewrbîyayoxî, peynî de qerenfîlî dayî cayê ke Taybet Înan uca de amebî qetilkerdiş. Dima ra zî girse verê xo da zîyaretîyê keyeyanê kesanê ke qirkerdişî de ameyî qetilkerdiş û goranê înan.