MERKEZÊ XEBERAN - 14ine konferansê Meclîsê Îştarî yê wargehê multecîyan ê Mexmûrî bi sloganê, “Ma komelê demokratîkî û komînal awan kenê, Rayberî dir azad ciwîyenê” dest pêkerd.

 

14ine konferansê Meclîsê Îştarî yê wargehê multecîyan ê Şehîd Rustem Cûdî (Mexmûr) bi sloganê “Ma komelê demokratîkî û komînal awan kenê, Rayberî dir azad ciwîyenê” salona konferansî de bi tewrîbîyayîşê 400 delegan dest pêkerd. Salona konferansî bi nuşteyê “Ganî cinî awankerdişê cuya têduşt û azade de serkêşîye bikero”, “Bi cinîya sosyalîste ma do komelê komînal virazê”, “Bi têkoşînê cinîyan ver bi Rayberîya Gerdûnî” û fotograf û posterê şehîdan ameyî xemilnayene.

 

Verê ke konferans dest pêbikero semedê heme cangorîyê azadîya Kurdistanî deqeyêk rêz ame girewtiş. Dimayê rêzgirewtişî qiseykerdişê akerdişê konferansî hetê hemsereka wargehî Fatma Bîlen ra ame kerdene.

 

Fatma Bîlen destpêkê qiseykerdişê xo de konferans Rayberê Şarê Kurdî Abdullah Ocalanî û heme cinîyê têkoşerî rê pîroz kerde û va: “No konferans ra ma hêvî kenê bibo wesîleya ke kar û xebatê xurtî bêrê domnayîş. Ma do hemverê sîstemê qirkerde têkoşînê xo xurtêr bikerê. No proseso ke Rayberî dest pêkerde de xeylê hêzî est ê ke wazenê xirab bikerê. Lê ma do bi têkoşînê xo heme planê înan veng vejê. Ma do nê konferansî bikerê numûne. Ma do zêdeyêr wayîrê kar û xebatanê xo vecîyê. Ma do hemverê sîstemê kiştoxî vinderê. Ma do semedê heme serkêşanê ke semedê têkoşînê cinîyan canê xo feda kerdê zêdeyêr xo rêxistin bikerê. Ma do prosesê “Komelê Aştî û Komelê Demokratîkî” de sey cinî rol û mîsyonê xo bîyarê ca.”

 

Dimayê qiseykerdişê akerdeşî, dîwanê konferansî ame weçînayîş. Konferans bi wendişê perspektîfanê Rayberê Şarê Kurdî Abdullah Ocalanî domnaye.

 

Konferans do di rojî bidomîyo.