Devrîm Findik

 

STENBOL - Temsîlkara Hemsereka Pêroyî ya Kede Berpirsîyar a Partîya DEMî Sevtap Akdag ard ziwan ke butçeyê 2026ine yê Tirkîya parçeyêko girdê ci semedê şerî ameyo visnayîş û va: “awankerdişê aştîye çîyêko vay nîyo. Ganî butçeyêko gird semedê problemê bingehî yê komelî bêro visnayîş.”

 

Heyetê Pêroyî yê TBMM’yî do 8ê kanûne de dest bi pêvînayîşê Pêşnîyazqanûnê Butçeyê Îdareyê Merkezî yê 2026ine bikero û do 14 rojî bidomîyo. Yeno texmînkerdiş ke se ra 50ê butçeyê 2026ine semedê şerî, faizî û sermaye bêro visnayîş. Bi serran semedê şerî butçeyêko gird yeno visnayîş û lazimîyê bingehîn ê şarî nînê hesibnayene. Demê peyênan de welatijî nêeşkenê lazimîyê xo yê bingehîn bigîrê û maaşê asgarî kewto binê sînorê vêşanîye.

 

Temsîlkara Hemserekîya Pêroyî ya Kede Berpirsîyar a Partîya DEMî Sevtap Akdag derheqê babete de qisey kerde.

 

Sevtap Akdag ard ziwan ke pêvînayîşê butçeyî 8ê kanûne de dest pêkenê û do di hewteyan bidomnê. Sevtap Akdag va hêvîya înan a ya ke butçeyêko aştîyane û nan vejîyo meydan.

 

‘Awankerdişê aştîye çîyêko vay nîyo’

 

Sevtap Akdag dîyar kerde ke parçeyêko gird ê butçeyê Tirkîya semedê sanayîya şerî yeno visnayîş û va: “Aştî çîyêko vay nîyo. Awankerdişê aştîye vay nîyo. Eksê nê, demo ke aştî bêra awankerdiş, xerckerdişê çekan kêm beno. O wext do semedê lazimîyê şarî zêdeyêr butçe bêro visnayîş. Visnayîşê butçeyî de çîyo ke ganî bêro kerdiş est ê. Keyeyê ke tutanê xo nêeşkenê bişawê mektebî, ganî xerckerdişê înan bêro girewtiş. Ganî semedê tutanê ke şenê mektebî rojêk werd bêro dayene. Ganî maaşê asgarî binê sînorê vêşanîye ra nêkewo. Ganî çimeyê ke şert û mercê merdimî virazenê bibê.”

 

‘Butçeyê feqîran her ke şino kêm beno’

 

Sevtap Akdag dîyar kerde ke merdim semedê krîzê ekonomîye vêşanî dir rî bi rî mendê û va: “Wezîrê ekonomî vano ekonomî gird bîya. Ma ewnîyenê hûmare gird bîya la sifreyê ma her ke şino qij û kêm beno. Ma sey DEM Partî hewl danê lazimîyê şarî bîyarê ca. Ganî pereyê ke semedê çekan, semedê faizî yeno visnayene kêm bibo. Şima feqîran ra girewt da dewlemendan. Ma nê werte ra wedarnê.”

 

‘Ganî feqîrîya cinîyan bêro dîyene’

 

Sevtap Akdag dewam de va: “Ganî butçeyêko hemverê cinsê komelî hîsgêr bêro awankerdiş. Demo ke butçe semedê feqîrîye bêro visnayîş, ganî feqîrîya cinîyan vernê de bêro dîyene. Ganî butçeyêko ke feqîrîya cinîyan esas gêno bêro awankerdiş. Semedo ke meclîs bibo vengê şarî, ganî şar vengê xo kuçeyan de berz bikero. Ma semedê pêvînayîşê butçeyî tenya lingê meclîsî nêercnenê. Ganî wareyan de rêxistinbîyayîş bibo. Nika lingêkê xebatanê ma yê butçeyî yê semedê Nan û Aştîye Meclîsî de ya. Semedo ke nê waştişî bêkewê cuye ma têkoşîn kenê. La ma wareyan de zî kedêka gird danê. Bazar û sûkan de ma propagandaya nê kenê. Hevalê ma wareyan de yê. Ma 30ê teşrîna peyêne de Sancaktepeyî de pêvînayîşê “Ma semedê nan yênê têhet” viraşt.”

 

Vengdayîşê têkoşînî

 

Sevtap Akdag veng da û va: “Ma semedo ke vajê butçe semedê cinîyan, karker, ciwan û feqîran a wareyan de yênê têhet. Ma do her tim wareyan de bê. Ganî her ca de şarê ma piştîdayîşê nê têkoşînî bido. Semedê nê ma nika ra şarê xo dawetê têkoşînê Kede û Aştîye kenê.”