WAN - Cinî bostanê ke şaredarî tahsîs kerdê, berardiş kenê û pare kenê, hemverê krîzê ekonomî zî wareyê xoverdayîşî awan kenê.

 

Mudûrîya Polîtîkaya Cinîyan ya Şaredarîya Rêya  Armûşî, taxa Şafak de projeyê ‘bostanê bajarî yê cinîyan’ awan kerd. Çarçewaya projeyî de cinîyan fêkî û sebze ramitî. Cinîyê taxe derheqê bostanan de qisey kerdî û dîyar kerdî ke bostanî semedê destekê debara înan, derbaskerdişê demî û destekdayîşê semedê yewbînan bi feyde yê.

 

Sebebê ramitişê bostanî cinî û şar ê 

 

Vasviye Kiye dîyar kerd ke ganî cinî bêrê bostan, sebze û fêkîyan biramnê û wina va: “Şaredarîye nê bostanan semedê cinî û şarî tahsîs kerd. Ganî cinî wayîrê bostanî vejîyê. Mi zî xebata bostanî de cayêk girewt. Ez baxçeyê keyeyê xo de zî bostan viraznena. Karêk zehmet o la xora her kar zehmet o. Karê ma weş û bi keyf o. Şaredarî nê îmkanî da ma. Ma keyfweş ê. Ma şaredarî rê sipas kenê. Ganî semedê keye, dayîk û ciwanan rê hetkarî bêro dayîş. Ma nê bostanî de sebzeyan çînenê.” 

 

‘Ganî ma yewbînan rê bibê destek’

 

Vasfiye Kiye wina peynî ard: “Ma do sebzeyan bidê kesê hewcedar. Kurdî hetkarî ra hes kenê. Kurdî comerd û meymanperwer ê. Ganî ma yewbînan rê bibê destek. Ganî ma cewab bidê hewcedarîyê yewbînan. Ganî ma destek bidê yewbînan.”

 

‘Ma do projeyanê xo dewam bikerê’ 

 

Endama Şaredarîya Rêya Armûşî Yildiz Tuncer va ke yewin rey bostanê bajarî yê herême şaredarîya Rêya Armûşî akerda û va: “Bostan serê waştişê cinîyan de ame akerdiş. Serra vîyarte de zî bostanê ma estbî. Ma roja dayîkan de dîyarî kerdibî. Ma emser zî roja dayîkan de dîyarîya dayikan kerd. Do projeyê ma yê winasî dewam bikerê. Bostanê Bajarî serê 2600 metrekareyî de ameyî awankerdiş. Ma da 40 cinî. Armanc o bî ke cinî destek bidê keyeyê xo û wextê xo derbaz bikerê û wareyêk înan bibo. Semedê ma vernê de cinî û ciwanî yenê. Çi destê ma ra bêro ma do bikerê.”