Elfazî Toral

 

STENBOL - Rêxistinê ciwanan dîyar kerdî ke ciwanan seba serewedaritişê komelkî serkêşî kenê û vatî: "Ma ciwanî do dinya xelas bikê. Seba ke proses bivurîyo aştî, ma ciwanî do pîya xetê têkoşînî gird bikerê."

 

Meclîsê Ciwanan yê Kongreya Demokratîk ya Şaran (HDK) 15-16ê Hezîranî Stenbol de bi şîarê "Ciwan û komelê demokratîkî" konferans organîze kerd. Her hetan ra rêxistinê ciwanan beşdarê konferansî bîyî û zaf babetî ameybî erjnayîş. Peymanê têkoşînê yewbîyayeyê hemberê polîtîkayê îqtîdarî vejîya vernî. Rêxistinê ciwanan derheqê konferansî de erjnayîş kerdî.

 

‘Ciwanî seba serhildanê komelkî serkêşî kerdî’

 

Kordînasyona Merkezê Ciwananê Azadîwazî ra Beyda Ceylan dîyar kerd ke seba polîtîkayê îqtîdarî ciwanî bi hêrs rayîr ra şinê û va: "Bi taybetî rêxistinbîyayîşê ciwananê unîversîteyan muhîm o. Badê 19ê Adare ma ciwanê ke hêrsê înan gird bîyo, înan reyde ameyî rî bi rî. Ciwanî seba serewedaritişê komelkî serkêşî kerd. Unîversîta û kampusan ra vejîyayî û vatî hêrs gird bîyo. Unîversîteyan de wendekaran kenê kedkar. Hemberê nê de reaksîyon est o. Ma seba rêxistinbîyayîşê nê hêrsî berpirsîyar ê. Hemberê feqîrî û kedkarbîyayîşî de waîtişê ma est o. Ma wazenê unîversîteya xo azad û demokratîk bikê. Ganî xoverdayîş bêro rêxistinkerdene. Ma hemverê talanê xozayî zî wareyê ciwîyayîşî pawenê. Serra 2025î sey serra keyeyî ame îlankerdene. Bi destê îqtîdarî şîdetê cinîyan ser o zêde beno. Kede û bedenê cinîyan yeno binpaykerdiş."

 

'Ma do têkoşînî berê wareyan'

 

Beyda Celan peynîya qiseyê xo de va ke prosesê newîye de waştişê aştîye ardo ziwanî û wina dewam kerd: "Îqtîdar wazeno şarê kurdî, ciwanan, ekolojîstan bêveng bikero. Wazeno serdest bibo. La ganî ma sey kîrdeyê prosesî têkoşîn bikê. Ganî cinî, ciwan, ekolojîst, elewî pîya pê dir têkoşîn bikerê û proses biaçarnê aştî. Ganî her kes qiseyê xo, waştişê xo bîyaro ziwan. Ganî ma sozêk bidê yewbînan û têkoşîn biresnê wareyan."

 

‘Problema kurdî, krîza ekonomî, problemê demokrasîye yo’

 

Berpirsîyara Ciwanan ê Tirkîya ya Partîya Têgêrayîşê Kedkaran (EHP) Derîn Doga Kuş dîyar kerd ke ê paştdayîş danê têkoşîn û waştişê aştîye ya şarê kurdî û wina dewam kerd: "Têgêrayîşê kurdan, aştî rast bivîno, ma zî kîşte înan de yê. Ganî problemê kurdî bêro çareserkerdiş. No 200 serrî yo problemê kurdî est o. Ganî problemê kurdî bêro çareserkerdiş. Welat de şerêko demokrasîye yo gird est o. Problemê ekonomî est o. Se ra 60 welatî bi meaşê tewr kêm xebitênê. Daye binê sînorê feqrîye de yo. Ganî no bivurîyo."

 

'Ma ciwanî do dinya xelas bikê'

 

Derîn Doga Kuş wina qedêna: "Têgêrayîşê ciwanan sîyaset beno meydanan. Ciwanî nika dakewenê meydanan û sîyaset kenê. Her cayê ke ciwanan pelçiqnayê, ma kewtîme meydanan. Ma do dinya xelas bikê. Ma têkoşînê rêxistinkerde pawenê."