Elfazî Toral

 

STENBOL - Fatma Akaltun ya Nêweşxaneyê Fek û Didanan ê Okmeydani yê Stenbolî sey teknîsyena anestezî şuxilyayîne, dermanê ke tarîxê înan derbaz bîbî, îdareyî rê neql kerd. Dimayê nê Fatma Akaltun nêweşxane de ame surgunkerdiş. Fatma Akaltun dîyar kerd ke semedê raştî veta werte ameya cezakerdiş.

 

Fatma Akaltun ya Nêweşxaneyê Fek û Didan ê Okmeydani yê Stenbolî sey teknîsyena anestezî şuxilyayîne, pêwa ke semedê dewaya ke 2018ine de ci ra ameyîne muhakemekerdiş, berat kerd zî 25ê hezîrana 2024ine de wezîfe ra amî durvistiş. La serê îtîrazan çeleyê 2025ine de newe ra açarya serê wezîfeyê xo. La na rey semedê binpaykerdişê nêweşaneyî ameyîne ciwîyayîş, îdareyî rê neql kerd ke nêweşxane ra amî surgunkerdiş û tayînê Nêweşxaneyê Bajarî yê Prof. Dr. Cemîl Taşçioglu yê Okmeydani amî kerdiş.

 

Fatma Akaltun derheqê binpaykerdişê nêwşexaneyî de ajansê ma rê qisey kerd.

 

Goreyê îdiayê Fatma Akaltun, nêweşxaneyê derman, bone, lepik, maske û enjektorê demê înan derbaz bîyê şuxilnayî û bi desan rey serhekimî rê neql kerd û va: “Eynî wextî de mi fotografê ke nê binpaykerdişî belge kerdêne zî şirawit. No problemêk pîl ame vînayîş. Pêwa nê ez surgunê nêweşxaneyêk bînî ameya kerdiş.”

 

‘Pêwa muracatê mi cewabêk nêame dayîş’

 

Fatma Akaltun va, aye hemverê nê probleman bêveng nêmenda û semedê nê zî raştê mobîngî ameya û va gerrekerdişî ser o tedayî zêde bîyê. Fatma Akaltun îdia kerd ke hînan zî etîketê kanan ser o newe dayê pito û no tena cuya nêweşan nê, xebatkaran zî keno rîsk.

 

‘Hemverê huqûq û edaletî yo’

 

Fatma Akaltun dîyar kerd ke badê gerrekerdişî tayînê  aye Nêweşxaneyê Bajarî yê Prof. Dr. Cemîl Taşçioglu yê Okmeydani ameya kerdiş. Fatma Akaltun wina va: “No prosesêk bêhiqûqî yo. Heqê mi ame binpaykerdiş. Ez o heta peyîn heqê xo yê qanûnî bişuxilnî. Pêwa nê ez metodê etîk yê meslegî dur nêkewta û bi hişmendî ke weşîya îstîmlakî bipawê têgêrayî. Selahîyetdarî vera îqazê mi verê çiman de bigîrê ez ceza kerda. Ez o têkoşînê xo dewam bikerî.”