Rabîa Onver - Dîlan Babat

 

COLEMÊRG - Tituno ke pîya yeno çinayîş, tena çimeyê debarî nîyo, sembolê piştîdayîşê cinîyan o. Cinî pêwa şertê giran ê xebate berardişî domnenê û dîyar kenê ke yewîye xebata înan asan kena.

 

Dewêke nêzdîyê sînorî de, roj vernîya roşinbîyayîşî bi keda cinîyan dest pêkeno. Cinîyê ke serê sibayî wurzenê, arayî amade kenê, tutanê xo oxir kenê, verê xo danê hêgayê titunî. Tîya de berardişê titunî tena çimeyê debare nîyo, beşêk kulturê cuya hembeşî ke bi piştîdayîşî yeno domnayîş o.

 

Çinayîşê titunî de baro tewr giranî cinîyan ser o. Dewa bêgoza ya Şemzînanê Colemêrgî de cinî bi saetan binê germayî de kede danê. Keda cinîyan nîno dîyayîş û barê tewr giranî yê berardişî milê cinîyan ser o.

 

Kede nîna dîyayîş

 

Cinîyan hêga de yewbînan rê hetkar benê, nimûneyêk gane yê cuya komunal û piştîdayîşî awan kenê. Têkoşînê înan şekilê cuyêka ameyoxî beno.

 

‘Ma her xebate kenê’

 

 

Perîhan Şakar va ke 40 serrî yo xebata titunî kenê û va: “Ma tena xebata titunî nêkenê. Ma heme xebatan kenê. Ma pesdewarî kenê, ancenê. Nan pewijnenê. Hamnanî zaf germ o. Pêwa nê ma serê sibayî wurzenê xebata xo kenê û şinê zozan. Dimayê ke ma zozan ra ameyî ma şinê hêgayê titunî. Ma hezîrane de titun çînenê û êlule de berardişî dest pêkenê. Titun 80 rojî herre de maneno, dima ra ma bi kom kenê, wuşk kenê û roşenê.”

 

‘Cinî heme xebatan dir eleqedar benê’

 

Perîhan Şakar wina dewam kerd: “Cinî her sewîyeyî de kedêk pîl danê. Xebata keyeyî, yê baxçeyî û citkarîye. Ma hemverê keda xo nêgînê la ma mecbûr ê. Xebatêk bîn çin a. Na xebate ma est a. Ma dewijî yewbînan rê hetkar benê.”

 

 

‘Ma bi nê debare kenê’

 

Seyhan Şakar zî va ke cuya înan ya dewe pirrî vîyarena û wina dewam kerd: “Ma bi herra xo dir xebata keyeyî dir eleqedar benê. Bi serran ma bi titunî debare kenê. Mêrdeyê mi tepişte yo. Ez titun çînena, mêrde û tutanê xo rê ewnîyena. Xebata titunî zehmet a. Ma çînenê hîrê aşman ra dima ma kom kenê. Ma bi nê debare xo kenê. Sewbîna çareyê ma çin o. Ma yewbînan rê hetkar benê. Her çiqas her serre vayî zêde bibo zî semedê zemî, ma hemverê keda xo nêgînê.”

 

 

‘Heme bar milê cinîyan ser o’

 

Menîce Şakar zî eşkera kerd ke 50 serrî yo xebata titunî kenê û ard ziwan ke titun zaf sewîyeyan de vîyareno û keda ke yeno dayîş zaf zêde yo la hemverê kedê xo nêgînê. Menîce Şakar nê çî ard ziwan: “Çinayîşî heta girewtişî her xebate ma kenê. Ma mecbûr ê. Sewbîna çare çin o. Awe çin a. Ma bi jeneratorî awe anê herre ser. Cuya dewe weş a la zehmet a. Heme bar milê cinîyan ser o.”