STENBOL - Temsîlkara KCDPyî ya Stenbolî Şîrîn Yalincakoglu dîyar kerd ke polîtîkayê “10 Serranê Keyeyî û Nifûsî” cinîyan tena bi welidîyayîşî pênase keno û va: “Cinîyan sey hacet vînenê û resnenê sewîyeya koletîye. No nêzdîbîyayîş suco ke cinîyan ser o yeno kerdiş.”

 

Temsîlkara Platformê Ma Do Qetilkerdişanê Cinîyan Vindarnê (KCDP) ya Stenbolî Şîrîn Yalincakoglu derheqê polîtîkayê “10 Serranê Keyeyî û Nifûsî” ke îqtîdarî eşkera kerd û do heta 2035ine bidomîyo de qisey kerd. Şîrîn Yalincakoglu eşkera kerd ke hewl yeno dayîş ke cinîyan hepsê keyeyî bikerê û polîtîkayê babeta vatişî hetê cinî, tut û mêrdan de do vernîya netîceyê giran akero.

 

‘Serra keyeyî de tutî nêameyî pawitiş’

 

Şîrîn Yalincakoglu “serra keyeyî” ard vîr û va ke nê prosesî de binpaykerdişê heqî yê hemverê tutan rojeve ra nêkewt û wina dewam kerd: “Serra vîyarte ke sey serra keyeyî ame îlankerdîş de ma dî ke tutê neweyê ke ameyî dinya nêweşxaneyî de terkê merdişî ameyê kerdiş. Tutî heqê perwerde, weşîye û piştîdayîşê komelî ra bes feyde nêgirewtî. Zafê tutan semedê problemanê ekonomî dibistanan ra dûr kewtî û kewtî mîyanê tora sucî.”

 

‘Nêzdîbîyayîşêk ke cinîyan keno hacet’

 

Şîrîn Yalincakoglu wina dewam kerd: “Çarçeweya serra keyeyî de cinîyan tena sey kesê ke tutî yenê dinya ameyî pênasekerdiş. Berpirsîyarîyê cinîyan roje bi roje zêde benê. Cinîyan sey karkerê keyeyî û kesê ke tutan bîyarê dinya yenê dîyayîş. Cinîyan sey hacetî û sey kole vînenê. No qerarêk o ke hukmatî girewt û sucê hemverê cinîyan o.”

 

‘Îfadeyê tutan çin yenê hesabnayîş’

 

Şîrîn Yalincakoglu bale ant problemê bêcezaverdayîşî û va: “Dewaya îstîsmarî de îfadeyê tutan esas nînê girewtiş. Îfadeyê tutan çin yenê hesabkerdiş. No nêeşkeno bêro qebûlkerdiş. Demêk derg o cinîyan kalibê ‘cinîya maqûl’ de sînor kenê. No fehmo ke hetê cinîyan ra nîno qebûlkerdiş. Cinîyan sereyê xo hemverî nê de nêtewênenê. Şerê ekonomîkî yê welatî cinîyan hem xebate, hem zî weliddayîşî de dano zor. Cinîyan ser o zordarîyê zafhetî est ê.”

 

‘Na polîtîka eşkena şîdet zêde bikero’

 

Şîrîn Yalincakoglu wina qedêna: “10 Serranê Keyeyî û Nifûsî hedef keno ke cinîyan hepsê keyeyî bikero. No nêzdîbîyayîş zî fehmê serdest ê mêrdan xurt keno. Mesajê ‘cinî malê to ya, ti eşkenê her çî bikerê’ danê mêrdan. Na polîtîka zî cinîyan komelî ra dûr fînena. Na polîtîka şîdet zêde kena. Cinî mecbur nîyê ke sereyê xo hemverê nê de bitewinê. Ma ganî hemverê nê de têkoşîn bikerê. Ma tîya yê. Ma sey platform semedê rêxistinbîyayîşî akerde yê.”