MÛŞ- Şîrketo ke semedê projeyê JES’î yê Gimgimî destûr ci rê ame dayîş, waştişê walîyê destûr dabi, derheqê keşfê cayê projeyî nas nêkerd. 

 

Çalakîya nobetî ya roniştoxanê dewe û ekolojîstan ê vera projeyê Santralê Enerjîya Jeotermal (JES) ke yeno pawitene dewa Xwarikî ya qezaya Gimgimî ya Mûşî de bêra virazene û do tesîrê xo 16 dewan bikero, roja 12ine de dewam kena. Serektîya Komîsyonê Bajarî ya Walîtîya Mûşî, verê nê projeyî seba projeyê JES’î yê Şîrketê Anonîm ê Berardişê Enerjîya IGNIS H2’yê destûr dabî. Dimayê nê qerarê erêkerdişî, şîrket pêwa nêrazîbîyayîş û çalakîyan zî qerar da ke 20ê gulane de sondajê ewilî ronîyo. Labelê welatijan seba vindarnayîşê projeyî muracatê Dadgeha Îdare ya Çewlîgî kerd.

 

Avûkatê dewijan Bariş Yildirimî derheqê prosesê huqûqî de agahî da. Bariş Yildirimî da zanayene ke Midûrîya Bajarî ya Derûdorî, Bajarwanî û Vurnayîşê Hewayî ke binê banê walîtîye de xebitîyena, derheqê projeyê ke yeno waştene bêro virazene de seba şîrketan nuşte şirawito. Bariş Yildirimî va ke midûrî, tespîtê “proje mîyanê wareyê xozayî yê mûhîme de ca gêno” kerdo û şîrketî ra waşto ke derheqê babete de muracatê zanîngehe bikero, beşanê ke qalê înan beno de keşf bikero û agahîyan bido. Bariş Yildirimî va ke şîrkete hewceyîyê nuşteyî ca nêardê û înan zî belgeyê derheqê na babete de dadgehî reyde pare kerdî.