AMED - Avûkata OHD’yî Ronahî Çîftçî dîyar kerd ke 11ine pakêta hukmî sûcê şîdetî yê hemverê cinîyan de tehlîyekerdiş û vistişê ceza pê anê û va: “Şîdetê camêrdan û dewlete yewbînan ra xoser nîyê.”

 

11ine pakêta hukmî ya ke meclîsî ra derbas bî, bi vurnayîşê rejîmê înfazî camêrdê sûcê şîdetî yê hemverê cinîyan ra ameyê tepiştiş, tehlîye kena û ceza fînena. Nê semedî ra reaksîyonê hemverê pakête her ke şinê zêde benê. Rêxistinê cinîyan û huqûqnasî dîyar kenê ke vera pawitişê heqê cuya cinîyan polîtîkaya bêcezaverdayîşî giran bena. Endama Komeleya Huqûqnasanê semedê Azadîye (OHD) avûkate Şuheda Ronahî Çîftçî derheqê babete de qisey kerd û da zanayîş ke dewlete berpirsiyarîyê destûrê bingehîn û mîyanneteweyî yê pawitişê cinîyan de qels kena û tabloyê vejeno orte zî rîskê awankerdişî meşrû keno.

 

‘Pakête caardişan hîra kena’

 

Ronahî Çîftçî da zanayîş ke 11ine pakêta hukmî hetê îqtîdarî ra sey sererastkerdişêk ke aştîye xurt kena, rejîmê înfazî têduşt keno û rehet keno, ameya pêşkêşkerdiş û va: “Labelê hetê heqê cuya cinîyan de na pakête berpirsiyarîyê pawitişê dewlete qels kena. Hetê cinîyan de rîskan zêde kena polîtîkaya bêcezaverdayîşî daîmî kena. 17ine madeyê destûrê bingehîn tena pawitişê heqê cuye nêdano dewlete, eynî demî de bi hawayêko aktîf pawitişê heqê cuye dano. Bi 11ine pakêta hukmî vurnayîşî ameyê kerdiş gumanbarê şîdetî yenê tehliyekerdiş. Caardişê vistişê înfazî û veradayîşê bi kontrol hîra bîyo.”

 

‘Destkewtîyê cinîyan bêtesîr yenê verdayîş’

 

Ronahî Çîftçî dîyar kerd ke hetê cuya cinîyan de 11ine pakêta hukmî vernîya şîdetî nîgana eksê ci nê şîdetî awan kena û çarçeweyêka huqûqî ya ke şîdetî meşrû kena, yena viraştiş. Ronahî Çîftçî dîyar kerd ke dewlete ne pawitişê cuja cinîyan, kontrolkerdişê ser cuya cinîyan esas gêna û destkewtişê cinîyan zî bi nê bêtesîr yenê verdayîş.

 

‘Şîdeta camêrd û dewlete yewbînan ra xoser nîyê’

 

Ronahî Çîftçî dewam de dîyar kerd ke paradîgmaya azadîya cinî tena sewîyeya heqê şexsî de nê, hetê vurnayîşê cimatî de zî sey hêzê awankerdox yena destgirewtiş û va: “Nê semedî ra zî têkoşînê cinî sîstemê serdestî yê camêrdî de raste rast cipersayîş keno. Şîdetê camêrd û dewlete yewbînan ra xoser nîno ercnayene. Heta cinî azad nêbê ne huqûqêko adîl ne zî aştîya cimatî mumkin nîya.”

 

Ronahî Çîftçî peynîya qiseykerdişê xo de wina va: “Şorişê Rojawanî bi serkêşîya cinîyan ame awankerdiş referansêk gird pêşkêş keno. Pratîkê Rojawanî tena xoverdayîşêk herêmî nîyo. Modelêk cuya alternatîf ê somutî hemverê her tewirê şîdetî ke cinîyan hedef gêno yo. Nê hetî de ez xoverdayîşê Rojawanî silam kena.”