RIHA - Hemsereka Dayîreyê Têkîlîyanê Teberî ya Rayberîya Xosere ya Vakûr û Rojhelatê Sûrîye Îlham Ehmed forumê Dihokî de qisey kerd û vat: “Nuqtaya tewr muhîme ya seba Sûrîye de awankerdişê aştîya komelkî û cuya hembeşe, bedilîyayîşê zîhnîyetê îqtîdarî, qebulkerdişê heqanê şaran û awankerdişê rayberîyêka nemerkezî ya.”

 

Hemsereka Dayîreyê Têkîlîyanê Teberî ya Rayberîya Xosere ya Vakûr û Rojhelatê Sûrîye Îlham Ehmed Forumê Aştî û Ewleyî yê Rojhelatê Mîyanên ke Dihok de yeno kerdene, qisey kerd.

 

Îlham Ehmed vat: “Babeta aştî Rojhelatê Mîyanênî de babetêka bingeyîn a ke çend prensîban ser o ameya awankerdene. Înan ra yew zî zîhnîyeto ke ganî bingeyê xurtkerdişê aştî ser o newe ra bêro şekildayene û çareserî zî rayberîya nemerkezî ya. Nuqatayêka bîne ke awankerdişê aştî de rolêko muhîm kay keno, babeta naskerdişê heqanê şaran û temsîlkaran a. Mîyanê înan de heqê şarê kurdî zî est ê ke demê rejîmê verên ê Beasî de ameyê binpaykerdene. Nika ma teqez kenê ke ganî nê problemî Sûrîyeya newa de bêrê çareserkerdene.”

 

Îlham Ehmed behsê babeta cinîyan kerd û wina qisey kerd: “Problemê cinîyan nuqtayanê bingeyînan ra yew o ke eke nêro çareserkerdene, problemê aştî zî çareser nêbeno. Seba ke problemê cinîyan tesîrêko rasterast problemê aştîya komelkî ser o keno ke do bibo bingeyê aştîya sîyasî û cuya hembeşe. Ganî no problem bi destûr û qanûnî bêro çareserkerdene ke no zî bi şekilê nemerkezî beno.”

 

Peynîya qiseykerdişê xo de Îlham Ehmed dîyar kerd ke aştîyêka ke cinî tede çin bî, nêeşkena biba aştîyêka domdar.