Elfazî Toral

 

STENBOL - Dayîka Aştîye Rewşan Doner hemverê şîdetê camêrd-dewlete de bale ant serê pawitişê cewherî û wina va: “Ganî ma têkoşînê xo yê hemverê şîdetî bi pawitişê cewherî dest pêbikerê.”

 

Sey her serre, cinî emser zî do 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî de hemverê şîdetê camêrd-dewlete, feqîrî, bêedaletî û bêhuqûqî kuçeyan de bê. Her 25ê Teşrîna Peyêne cinî bi armancê ke piştîdayîşê gird bikerê û têkoşînê gird bikerê yenê têhet û mesajê “Ma tîya de yê” danê.

 

Rewşan Doner da zanayîş ke xeylê tewirê şîdetî est ê û bi taybetî cinî rî bi rî şîdetî yenê. Wina va: “Yew tewirê şîdetî, şîdetê dewlete yo. Ma cinîyê kurdî hem dewlete ra hem zî keyeyê xo de şîdet vîna. Semedê zordarî û polîtîkayê dewlete ma bi her tewirê şîdetê fîzîkî û psîkolojîkî yenê. Keyeyê xo de rehet nêbenê, zordarîya fîzîkî û vatişî vînenê, no şîdetê psîkolojîk o. Ma her tewirê şîdetî şermezar kenê. Şîdet her wareyê cuye de tesîr keno. Tirkîya de şarê kurdî rî bi rî şîdetî yeno. Dayîkê kurdî şîdet vînayî. Şîdet tewr zaf cinîyan ser o tesîr keno. 25ê Teşrîna Peyêne nêzdî beno. Mana û muhîmîya roje gird a. Cinîyan hemverê şîdetî sere berz kerd û şîdet qebul nêkerd. Ganî komelêk bêşîdetî bibo. Ma her tewirê şîdetî lanet kenê.”

 

Pawitişê cewherî

 

Rewşan Doner wina domna: “Hemverê şîdetê camêrdî de ganî bêvengî nêbo. Ganî cinî hemverê yewbînan de xesas bê. Ganî yew bibê û bi pîya bê. Ganî pawitişê cewherî bikerê. Ganî hemverê de şîdetî perwerde bibê û wayîrê hişmendîyêk bibê. Ganî ma pawitişê xo yê cewherî aver berê û têkoşînê hemverê şîdetî bi pawitişê cewherî dest pêbikerê. Ganî ma xeta têkoşînî bimûnê.”

 

‘Ganî cinî hemverê şîdetî de wareyan de bê’

 

Rewşan Doner peynîya qiseykerdişê xo de wina va: “Semedê şerê ke yenê kerdiş tewr zaf cinî zîyan vînenê. Ca-war ferq nêkeno. Kam ca wa bibo, şîdet bibo ganî veng bêro berzkerdiş. Ganî ma hemverê şîdetî de bê. Tirkîya Peymana Stenbolî ra ancîya. Heqê cinîyan çinbîyaye hesibnîya. Demê Peymana Stenbolî bî zî şîdet bî, labelê dimayê ke ame feskerdiş şîdet hîna zêde bî. Aşmêke de 30-40 cinî yenê kiştiş. Ma nê kiştişan lanet kenê. Ganî ma bi pîya meydanê 25ê Teşrîna Peyêne de bê û hemverê şîdetî vengê xo bi pîya berz bikerê. Ganî heme cinî hemverê şîdetî de wareyan de bê.”