MERKEZÊ XEBERAN - Meclîsê Cinîyanê DBP’yî çarçeweya çalakîyanê 25ê teşrîna peyêne de zaf bajaran de bi sernameyê “Îdeolojîya Azadîya Cinîyan” atolye organîze keno û do ser azadî, xopawitiş û têkoşînê komelî yê hemverê şîdetê pederşahî de vindero.

 

Bi nêzdîbîyayîşê 25ê teşrîna peyêne Roja Têkoşînê Hemverê Şîdetê Hemverê Cinîyan ê Mîyanneteweyî de rêxistinê cinîyan û meclîsê cinîyanê partîyanê sîyasî bernameyê xo yê çalakîyan eşkera kerd.

 

Meclîsê Cinîyanê Partiya Herêmanê Demokratîk (DBP) çarçeweya çalakîyanê 25ê teşrîna peyêne de zaf bajaran de do atolye organîze bikero û do bale bianco Îdeolojîya Azadîya Cinê ser. Atolye de rêxistinbîyayîş, xopawitiş, têkoşînê komelî û xoverdayîşê hemverê şîdetê pederşahî do bêrê munaqeşekerdiş.

 

Meclîsê cinîyanê DBPî do Mêrdîn, Amed, Sêrt, Dêrsim, Çewlig, Wan, Colemêrg, Îdir, Agirî, Muş, Şirnex, Osmaniye, Îzmîr û Erzîrom de atolye organîze bikero.

 

Sewbîna Meclîsê Cinîyanê DBP’yî dîyar kerd ke do beşdarê plansazîyê 25ê teşrîna peyêne yê Têgêrayîşê Cinîyê Azadan (TJA) bibê.