Şehrîban Aslan

 

AMED - Avûkate Zeynep Karayilan da zanayene ke lazim o hetê hûqûqî de cewabê gamanê ke Têgêrayîşê Azadîya Kurdî eştî bêro dayîş û wina va: “Lazim o qanûnî bêrê caardiş, fek polîtîkayanê înkar û îmhayî ra bêro veradayîş, bi vurnayîşê qanûnî û destûrê bingehîn vernîya sîyasetê demokratîkî bêro akerdiş, entegrasyon bikewo cuya.”

 

Têgêrayîşê Azadîya Kurdî esasê erêkerdişê Rayberê Şarê Kurdî Abdullah Ocalanî de 26ê Teşrîna Verêne de Qendîl de eşkerayîyêkê tarîxî da. Eşkerayîye de dîyar kerd ke esasê qeraranê 12ine Kongreya PKK’yî de hêzanê xo Tirkîya ra ancenê. Gama ke ameya eştiş Kurdistan, Tirkîya û her cayê Tirkîya de veng da. Çimê şarî gamanê somutan ê dewlete ser o yê.

 

Hemsereka Komeleya Huqûqnasanê Semedê Azadîye (OHD) ya Amedî Zeynep Karayilan derheqê gama ke ameya eştiş û hemverê na game, gamanê ke hetê hûqûqî de lazim o bêrê eştiş ser o ercnayîş kerd.

 

Kurdî pey yewbînan gaman erzenê

 

Zeynep Karayilan bale ant ser qerarê antişê Têgêrayîşê Azadîya Kurdî û wina ard ziwan: “Qeraro ke ameyo dayîş hetê hûqûqî de hema cewabê ci çin o zî na game hetê bêpêrodayîşî de nîşaneyêkê nîyetêk baş o. Ganî Tirkîya goreyê nê game bierzo. Hûqûqê mîyanneteweyî de zî wina yo. Ganî no pêrodayîş goreyê metodê hûqûqî û merdimî bêro asankerdiş. Dimayê vengdayîşê 27ê Sibate ya tarîxî, PKK’yî pê dima gaman eşt. Hema zî erzenê. Eşkerayîya 26ê Teşrîna Verêne ke ameya dayîş zî zaf muhîm a. No zî qerardarî û îsrarê PKK’yî yê aştîye de nîşan dano.”

 

‘Ganî entegrasyon êdî bêro munaqeşekerdiş’

 

Zeynep Karayilan va, hemverê gamanê ke ameyî eştiş binê sîwanê meclîsî de komîsyonêk ame viraştiş la o komîsyon nêresa sewîyeya ke yeno tehayulkerdiş. Zeynep Karayilan va, komîsyonî xeylêk hetan goşdarî kerd û wina ard ziwan: “La muxatabê prosesî birêz Ocalan hema nêameyo goşdarîkerdiş, bi akerdişê serra newî çîyêk nêame pêşkêşkerdiş, proses demî rê ameyo vilakerdiş. Semedê nê zî lazim o komîsyon hemverê gamanê ke yeno eştiş de refleks bimojno. Semedê asayîşê prosesê antişî, eşkenê qerar û qanûnî bêrê vejîyayîş. Eşkeno asayîşê prosesî bêro girewtiş. La hema polîtîkayanê înkar û asîmîlasyonî domnenê. Ganî vernîya sîyasetê demokratîkî bêro akerdiş û entegrasyon bêro munaqeşekerdiş.”

 

‘Birêz Ocalan berpirsyarîyê cidî girewt xo ser’

 

Zeynep Karayilan va, tecridê Rayberê Şarê Kurdî Abdullah Ocalanî ser, hetê prosesê aştîye semedê ameyoxêk demokratîk astengêkê cidî yo û wina va: “Prosesî dir ganî tecrid bêro wedaritiş û şert û mercê ke Birêz Ocalan eşkeno piştdayîş bido prosesî bêrê viraştiş. Pêwa tecrîdo giran Birêz Ocalan berpirsyarîyê cidî girewt xo ser û PKK’yî zî cewab da nê berpirsyarî.”

 

‘Heqê hêvîye nêeşkeno bibo babeta bazarî’

 

Zeynep Karayilan bale ant ser qeraranê DMME’yî û va: “Qeraranê DMME’yî nêyênê caardiş. No bi tena sereyê xo yeno manaya binpaykerdişê qedexeyê îşkenceyî. Muxatabê esas ê prosesî Birêz Ocalan binê tecrîdî de yo. No zî vernîya xetimnayîşê prosesî akeno. Qeraranê kongreya PKK’yî de ame dîyarkerdiş azadîya Birêz Ocalanî şert o. Semedê nê zî lazim o hemverê nê gaman de no bêro caardiş. Heqê hêvîye nêeşkeno bibo babeta bazarî. Tirkîya terefgirê Peymana Mîyanneteweyî ya Heqê Medenî û Sîyasî ya NY’yî û Peymana Heqê Merdimayî ya Ewropa ya. Viraştişê Komîsyonê Heqîqet û Edaletî binê berpirsyarîyê mîyanneteweyî de zî yo. No komîsyon bi qerarê meclîsî yan zî bi qanûnêkê xoser eşkeno bêro viraştiş.”

 

Zeynep Karayilan wina peynîya qiseykerdişê xo ard: “Ganî heto hemver bi gamanê hûqûqî cewab bido nê gaman. Ganî qanûn bêrê caardiş, fek polîtîkayanê înkar û îmhayî ra bêro veradayîş, bi vurnayîşê qanûnî û destûrê bingehîn vernîya sîyasetê demokratîk bêro akerdiş, entegrasyon bikewo cuye. Ma hûqûqê demokratîk pawênê. Rojeva ma ya esas Komeleya Hûqûqnasanê Semedê Azadîye, gamanê goreyê hûqûqî ke lazim o bêrê eştiş û vurnayîşê ke bêrê kerdiş o. Semedê viraştişê cematê demokratîk lazim o zext bêro kerdiş û pê dir xebate bêrê domnayîş. Ganî hetê tewrê şarî yê prosesî de zî xebatî bêrê kerdiş.”