MERKEZÊ XEBERAN - 15 serrî ceza mamosteya dibistana sereyîne Furug Husrevî rê, ke bajarê Behbahanê Îranî de ciwîyena, ameye birnayene.

 

Mamosteya dibistana sereyîn Furug Husrevî, ke Behbahanê eyaletê Huzistanê Îranî de ciwîyena, bi îdiayê “Propagandaya hemverê rejîmî”, “Heqaretê hemverê Alî Hamaneyî”, “Heqaretê hemverê Humeynî”, “Heqaretê hemverê dînî” û “Sazîyê medyayanê ke Îsraîlî dir girêdayeyê têkilî daya ro”, bi pêroyî 15 serrî cezaya zîndanî werd.

 

Qerarê derheqê Furug Husrevî de ame dayene, Şubeyê 1ine yê Dadgeha Şorişî yê Behbahanî ra ame eşkerakerdene. Goreyê madeyê 134ine yê qanûnê cezaya Îslamî ya Îranî, cezaya tewr giran ke 5 serrî cezaya zîndanî ya, do bêro caardiş.

 

Roniştişê dewaya ke Furug Husrevî ci ra ameye muhakemekerdiş, 2yê teşrîna peyêne de ame kerdiş, qerar 3yê teşrîna peyêne de mamoste rê ame neqlkerdiş.

 

Verê zî ameye tepiştiş

 

Furug Husrevî serê sibayê 30ê hezîrana 2024ine de bi di cinîyan dir, 6 sîxuranê Îstixbaratê Muhafizê Şorişî ra bê agahî dayîşî, sereştişê keyeyê înan de ameye destbendkerdiş, cigêrayîşê keyeyî de dest dayî ser çîyê şexsî û telefonê înan.

 

Mamoste dimayê 29ê tebaxe newe ra ameye destbendkerdiş û 8ê tebaxe de bi kefaletê 2 mîlyar tûmenî Zîndanê Sepîdarî yê Abhazî ra ameye veradayîş.

 

Şubeyê 2yîne yê Daîreyê Cipersayîşî yê Dozgerîya Şorişî û Pêroyî ya Behbahanî, 21ê êlule 2024ine de derheqê Furug Husrevî de gerre kerdbî.

 

Ame dîyarkerdiş ke Furug Husrevî, dimayê protestoyanê serra 2009ine de, zanîngeha Bender Îmam Payam-e Nur amebî eştiş.