KOBANÊ – Mizgîn Xelîl derheqê serrgêra Roja Kobanê ya Dinya da zanayene ke têkoşînê cinîyan peynîya DAÎŞî ard û wina va: “Hemverê zihniyetê DAÎŞî ganî ma destkewtişê xoverdayîşê Kobanê bipawê. Esasê xo de pawitişê Kobanê pawitişê dinya bî. Pawitişê Kobanê pawitişê xeta cinîya azade yo.”

 

Serra 2014ine de DAÎŞî hêrişê Kobanê kerd. Bi serkêşîya têkoşînê cinîye, xoverdayîşê Kobanê sey mîrasêk mend. Bi têkoşîna xo yê serranê tewr tarîyanê tarîxî de, Kobanê tena semedê şarê Kobanê nê, la semedê heme dinya bî sembolê têkoşînî. 1ê Teşrîna Peyêne semedê rêzgirewtişê têkoşînê hemverê DAÎŞî, ke bi serkêşîya cinîyan ame domnayene, sey “Roja Kobanê ya Dinya” ame neqlkerdiş.

 

Temsîlkara Hemserekîya Encumene ya Îdareya Kantonê Firatî Mizgîn Xelîl derheqê serrgêra xoverdayîşê Kobanê, têkoşînê bi serkêşîya cinîyan hemverê DAÎŞî ame dayene ercna. Mizgîn Xelîl wina va: “Hemverê hêzek şîdetî û nameyê îslamê radîkalî ser o gêrayîne, hêzanê YPG û YPJî roşnayîyêk dinya rê,şaran rê vila kerd. Xêrcê şervanan tu hêzêk hemverê DAÎŞî vejîyo, nêvejîya.”

 

‘Roja Kobanê ya Dinya rojêk ê tarîxî yo’

 

Mizgîn Xelîl da zanayene şervanê kurdî hemverê DAÎŞî şerêk bêhempa domnayî û wina va: “Ma destpêk de 11ine Piştdayîşê Dinya yê semedê Xoverdayîşê Kobanê, Roja Kobanê pîroz kenê. Roja Kobanê ya Dinya hem semedê tarîxê Kobanê, hem zî semedê dinya rojêk tarîxî ya. Bêguman na roje xo ver nêbi Roja Kobanê ya Dinya. Bi xeylêk bedelanê girdan na roje ame îlankerdiş. Xeylêk kede ameye dayene. 2012ine ra şervanê YPG û YPJî xo bi rêxistin kerdî. Sîstemê xo yê pawitişî xeta hîrêne ser o viraşt. Wexto ke DAÎŞî Mûsûl û Reqayî kerd xo dest, xeyal kerd ke Kobanê zî do bigîro. DAÎŞ bi nê hedef û armancî kewt serê rayîrî. Bi rastîye zî nê wextî de destê şervanan de hende teknîkê averşîyaye zî çin bî. Bawerîyêk xeylêk xurt û îradeyêk pola înan dir bî. Bi nê îradeyî şer kerdî. Hemverê çeteyanê DAÎŞî û teknîkê înan ê newîye şervanan xoverdayîşêk bêhempa û efsanewar mojna. Semedê pawitişê Kobanê şewe û rojê xo kerdî yew. Şerê man û nemanî kerdî. Nê wextî de Tayyip Erdoganî va, ‘Kobanê kewt, ha keweno. Hemverê hêzek şîdetî û nameyê îslamê radîkalî ser o têgêrayîne, hêzanê YPG û YPJî roşnayîyêk dinya, şaran rê vila kerd. Vernîya şervanan de tu hêzek hemverê DAÎŞî vejîyo, nêvejîya.”

 

‘Semedê xoverdayîşê Kobanê piştdayîşêk dinya virazîya’

 

Mizgîn Xelîl dîyar kerd ke xeylêk kesan semedê Kobanê canê xo feda kerd û wina va: “Semedê xoverdayîşê Kobanê piştdayîşêk dinya virazîya. Xeylêk hêzanê kurdistanî nê wextî de tewrê xoverdayîşê Kobanê bîyî. Eynî wextî de pêşmerge zî bi çekanê xo yê averşîyayan tewrê bî. Sewbîna xeylêk ciwananê enternasyonalîstan tewrê bîyî. Heto bîn ra wexto ke Rayber Apo seferberî neql kerd û va, ‘Kobanê xeta ma ya sûr a û ganî bêro pawitiş’. O wext koalîsyonê mîyandewlete zî hetkarî da. O wext mabênê ma de peymanêk virazîya. Na zî gamêka tarîxî bî. Xeylêk kesan ke belkî serê sibayê Kobanê zî nêdî semedê Kobanê şehîd kewtî. Şexsê şehîdanê xoverdayîşê Kobanê de, şexsê Arînan de, Viyanan de, Gelhatan de, Rêbanan de ma heme şehîdanê xoverdayîşê Kobanê anê xo vîr ra û mîyaneyê xo hemverê înan de tewênenê. Ma soz danê ma ê mîrasê xoverdayîşê înan serkewte bikerê. Ma minnetdarê gazîyanê şerî zî yê. Înan hemverê hêzê tarî de xo ver dayî.”

 

‘Pawitişê Kobanê pawitişê xeta cinîya azade yo’

 

Mizgîn Xelîl bala ant serê têkoşînê cinîyan ê xoverdayîşê Kobanê de û wina dewam kerd: “Semedê pawitişê destkewtişê şorişî xoverdayîşêk tarîxî ame dayene. Hêrişê Kobanê ser, hêrişê Şorişê Rojawanî bî. Bi nê rengî hêrişêk ame kerdiş. Xoverdayîşê Kobanê de destpêkê peynîkerdişê DAÎŞî yê nê wareyê cografya de bî. Eynî wextî de zî xoverdayîşê cinîyan, peynîya DAÎŞî ard. DAÎŞî xoverdayîşê cinîyan ra tersayîne. Vatêne, ‘Ganî ma bi destanê cinîyan nêrê qetilkerdiş. Ma bi destanê cinîyan bêrê qetilkerdiş ma nêeşkenê şêrê cenet’. Nê ra xeylêk tersayîne. Çike zihniyetê înan de cayê cinîye çin o. Cinîyan xoverdayîşê Kobanê de cepheyê vernî de cayê xo girewtî. Bêters û xof şer kerdî. Cinîyan çalakîyê fedaî zî kerdî. Hêzê YPJî verda ke xoverdayîşê cinîyan dinya de bibo sembolêk zî. Nika YPJ dinya de xeta cinîya azade de, sey hêzek hemverê DAÎŞî şer kerdo, yeno nasnayene. Hema zî fehmê DAÎŞî est o û hişmendîyê DAÎŞî est o. No tehluke û ters hema zî est o. Hemverê zihniyetê DAÎŞî ganî ma destkewtişê xoverdayîşê Kobanê bipawê. Nê esasî de pawitişê Kobanê pawitişê dinya bî. Pawitişê Kobanê pawitişê xeta cinîya azade yo. Ma bi nê munasebetî venga hêzanê dinya zî kenê ke wayîrê hemverê destkewtişê Kobanê vejîyê û piştdayîşê nê şorişî bikerê.”