Elfazî Toral

 

STENBOL – Yildiz Onen derheqê gamê neweyî yê Têgêrayîşê Azadîya Kurdî de wina qisey kerd: “Têgêrayîşê Azadîya Kurdî wezîfeyê kewtê milê xo ser bica ard. Ganî nê gamî verê çiman de bêrê girewtiş û cewabê nê bêrê dayîş.”

 

Rêxistina Têgêrayîşê Azadîya Kurdî, Qendîl de derheqê Prosesê Aştî û Komelê Demokratîkî de eşkerayîyêka tarîxî da. Na eşkerayî de ame neqlkerdiş ke gerîlayê Hêzanê Pawitişê Şarî (HPG) û Yewîneyanê Cinîyanê Azadan-Star (YJA-Star) goreyê qerarê Kongreya 12ine ya PKK’yî û bi erêkerdişê Rayberê Şarê Kurdî Abdullah Ocalanî dest bi antişê kerdê.

 

Endama Piştdayîşê Enternasyonalî Yildiz Onen derheqê babete de qisey kerd.

 

Yildiz Onen wina va: “Her çiqas no proses bi vatişê Devlet Bahçelî yê 1ê teşrîna verêne ya 2024ine de meclisî de kerd, bidest pêkerd zî 1999ine ra heta nika ke Abdullah Ocalan ardî Tirkîya no proses dewam keno û ez nê prosesî zî sey qonaxêk neweyî yê ci vînena. Nê semedê ra zî demêk gird o Têgêrayîşê Kurdî her tim nê hewldayîşî de yo ke dewlete dir masa ser o ronişo û komelê demokratîkî virazo. Meseleya kurdî, a mesela nîya ke mîyanê serrêke yan di serran de bêro çareserkerdiş. Demê Împaratorîya Osmanîyan de zî binpaykerdişê girdî, qirkerdişê girdî ameyî kerdiş. Awankerdişê Komara Tirkîya dir Kurdistan ameyo perçekerdiş û kurdî hetê dewletanê ke uca de mendêne ra ne hetê qanûnî û ne zî huqûqî ra nêameyî nasnayîş. Çi heyf waştişê esasî nêdayî. Çareserîya na mesela çareserîyek a demderg a. Çîyê ke Abdullah Ocalan û PKK’yî nê prosesî de va zî eynî çî yo. Vatî, bi çekan heta cayêk ameyê û nika ra tepîya munaqeşeyê demokratîkan de wazenê vurnayîşê komelî bikerê. La semedê vurnayîşê komelî ganî çend gamê eşkerayî bibê. Înan ra yew heqê hêvîye yo û ganî semedê Abdullah Ocalan bêro dayîş. Abdullah Ocalan 25 serrî tepişte yo û piştdayîşê ke dayê xeylêk bi qîymet ê. Analîzê ey yê girdî est ê. La hemverê nê de hema gamê eşkerayî nêameyê eştene.”

 

‘Ganî gamê têgêrayîşî bêrê dîyene’

 

Yildiz Onen bala xo ant hemleyê çekverdayîşê PKK’yî û va: “PKKî çeke verada. Hem Sûrîye, hem Iraq û hem zî Ewropa de bi hezaran kesî est ê. Wexto ke nê merdimî agêrê ganî semedê înan sererastkerdişê qanûnî bêro kerdiş. Bi serrêke yo proses dewam keno la gamêka eşkerayî çin a. Bi hezaran kesî zîndanan de tepişte yê. Tepişteyê nêweşî est ê. Rewşa înan giran a. Ganî semedê nê sererastkerdişê qanûnî bêrê kerdiş. Piştdayîşê şarê Kurdî semedê nê prosesî gird o. Ganî rew gamî bêrê eştene. Têgêrayîşê Azadîya Kurdî wezîfeyê kewtê milê xo ser bica ard. Çeke da ro. Wazenê vernîya vurnayîşî abibo. Ganî nê gamî verê çiman de bêrê girewtiş û cewabê nê bêro dayene. Ganî heme hetî cewab bidê vengdayîşî.”