ANQARA - Serekwekîla Grûba DEM Partî Gulîstane Kiliç Koçyîgît îfade kerd ke komîsyono ke Meclîsî de ameyo ronayene ganî bi Rayberê Şarê Kurdî Abdullah Ocalan zî pêvînayîş bikero, fikir û pêşnîyazanê ey goş bikero û vat: “Komîsyon ganî rew şêro Îmraliyî.”

 

Gulîstane Kiliç Koçyîgît Meclîsî de kombîyayîşê çapemenîye viraşt û rojeve erjnaye. Komîsyono ke seba asankerdişê çareserîya mesel eya kurdî Meclîsî de qismanê cîya-cîyayan goşdarî keno, ser o vindert.

 

Gulistan Kiliç Koçyîgît va ke parîya ke seba weşî û perwerdeyî nêyena cîyakerdene, herinda ney de seba şerî parîyêka girde yena cîyakerdene: “Ma vanê ke bûtçeya demê neweyî êdî bûtçeya şerî nêbo, bûçeya aştîye bo. Rayîrê aştîye de ma çend aver şêrê, îhtîmalê raştbîyayîşê nînan zî zêde benê.”

 

Gulistan Kiliç Koçyîgîte wina dewam kerd: “No komîsyon goş dano her kesî; dormeyê karî ra heta qismanê zeraradîyayeyan, serekanê Meclîsî yê verênan ra heta Yewîya Baroyî. Labelê ganî yew kesî zî goşdarî bikero. No komîsyon ganî rew şêro Îmraliyî û bi aktorê sereke yê prosesî Birêz Ocalanî têdîyayîş bikero, fikir û pêşnîyazanê ey goşdarî bikero.”

 

Gulistan Kiliç Koçyîgîte wina qedîna: “Rasta zî şîyayîşê Îmraliyî, Îmrali de goşkerdişê fikir û pêşnîyazanê Birêz Ocalanî bi xo seba ameyoxê her keso ke Tirkîya de ciwîyeno û şaranê bînan, seba aştîya ma ya komelkîye, seba averşîyayîşê prosesî ke ma vanê prosesê aştî û komelê demokratîkî muhîm o.”