Gulistan Gulmuş - Azîze Akoglu 

 

AMED - Keyeyê karkero ke Nîgde de netîceya hêrişê nîjadperestî de bi giranî birîndar bi û dermankerdişê ey dewam keno, dîyar kerd ke ganî hêrîşkar bêro muhakemekerdiş û vatî: “Semedo ke kurdî bî, hêriş kerdî. Ma do dewa abikerê û ma wazenê bêrê muhakemekerdiş.”

 

24 Karkerê mewsimî yê kurdî ke Sêwêrega Rihayî de arêdayîşê firingiyan şî bajarokê Çukurkuyu yê qezaya Borî ya Nîgdeyî, 29ê tebaxe de rastê hêrişê wayîrê erd û merdimanê înan ameyî. Hêriş de karker  Orhan Yedîkurt bi çeke bi giranî birîndar bi. 4 rojan Nîgde de beşê giran de mend û dima ra ardî Nêweşxaneyê Perwerdehî û Cigêrayîşî yê Gazî Yaşargîlê Amedî. Dermankerdişê karkerî dewam keno û keyeyê ey verê nêweşxane de pabebîyayîşê xo dewam keno.

 

Keyeyî derheqê hêriş de ajansê ma rê ercnayîş kerd.

 

‘Wa hêrişkarî bêrê cezakerdiş’

 

Ema Orhan Yedîkurtî, Zînet Taş wina va: “Bi çeke hêriş kerdê, heqeret kerdê. Semedo ke dewa înan bîya wina kerdê. 4 rojan uca beşê giran de mend. Hîrê rojî dima ardî tîya û di saetî emelîyat de mend. Ma tersenê ke seqet bimano. Wa gumanbarî bêrê cezakerdiş. Ma înan rê hemalî kenê, karê înan kenê ê zî hêriş kenê. Ma her tim na rewşe de yê. Ma her cayî de nê hêrîşan dir yenê rî bi rî.”

 

‘Ma gerre kenê’

 

Evîn Dagaçay zî dîyar kerd ke do derheqê înan de gerre bikerê û va: “Lajê birayê mi nika birîndar o û yeno emelîyatkerdiş. Nêheqîyêk pîl kerdê. Ma gerre kenê. 2-3 rojî de emelîyat de mendo la netîceyêke nêame girewtiş. Ma nêzanê do se bibo, ma tîya pawenê.”

 

Medîna Dagagaç zî dîyar kerd ke ganî hêrişkarî bêrê muhakemekerdiş û va: “Yê ke bî sebeb, ganî bêrê cezakerdiş. Kurdan ra nefret kenê. Hêvîdar a ke no çî înan rê nêmano.”

 

Sevdets Yedîkurt zî dîyar kerd roja ke hêriş ameyo kerdiş, keye de bîya û va: “Gêrayî mi û vatî, birîndar bîyo. Di linganê xo ra birîndar bibi. Emelîyat kerdî. Di rojan uca mend û dima ra ardî tîya. Tutê ma kuyayî. Heqaret kerdî. Semedo ke ma kurdî bî, hêeiş kerdî. Ma do dewaya nê bikerê. Wa cezaya xo biancê.”