AMED - Mudirîya Polîtîkayê Cinîyan ê Şaredarîya Peyasî, çarçewaya kampanyaya “Vatişê Ma Nêqedîya yo, Ma do Pîya Şîdet Vindarnê” de, aşma tebaxe de semedê vernîgirewtişê şîdetê cinîyan ser û xurtkerdişê hemkarî û destekdayîşê hemverê kiştişê cinîyan, forumê tewir bi tewir organîze kerd. 

  

Çarçewaya kampanyaye de; parkê Kuça, Dereboyu, Begonvil, Mîmoza, Xelîl Brahîm Oruç, Meryem Xan, Park Orman, Meydanê Bajarî, dewa Kirxalî û taxa Çardakli ke girêdayeyê qezaya Hênê ya, kombîyayîş cinîyan dir ame kerdiş. Nê foruman de bi pêroyî resayî 1471 cinîyan û derheqê rayîrê ke rewşê lazimîya destekdayîşî de senî eşkenê bêrê taqîbkerdiş, agahdarî amî dayîş. Sewbîna, pêşnîyazê cinîyan ê derheqê têkoşînê hemverê şîdetî de ameyî goşdarîkerdiş û bi armancê xurtkerdişê tora hemkarî û destekdayîşî ser o nêrînî ameyî parekerdiş.

 

Mudirîya Polîtîkayê Cinîyan ê Şaredarîya Peyasî dîyar kerd ke bi nê foruman do kîşte cinîyan de bê û aşma êlule de xebatê semedê zêdekerdişê hişmendîyê komelî vera şîdetî herêmê dewan de dewam bikero.