ŞIRNEX - Seba vengdayîşo tarîxî yê Rayberê PKK’yî Abdullah Ocalanî, şarê Botanî ver bi Amedî kewtî rayîr. Vengdayîşo tarixî do bi ekranê LEDî gandar bêro dayene. Welatijan mesajê xo de dîyar kerd ke zaf bi kelecan ê.

 

Heyetê DEM Partî yê Îmraliyî do pêvînayîşê bi Rayberê PKK’yî Abdullah Ocalanî ra pey vengdayîşo tarîxî yê Abdullah Ocalan pare biko. Beyanat do saete 17.00ine de Otelê Elît Worldî yê Stenbolî de bêro dayene. Seba beyanatî zaf şaristanan de amadekarîyî yenê kerdene ke nê şaristanan ra yew zî Amed o.

 

Seba beyanatî Warê Şêx Seîdî de ekranê LEDî yê girdî ameyî ronayene û vengdayîşo tarîxî yê Abdullah Ocalanî do gandar bêro temaşekerdene. Na çarçewa de zaf welatijî qezaya Cizîrî ya Şirnexî ra ver bi Amedî kewtî rayîr.

 

Ma bi kelecanêko gird paweyê beyanatî yê

 

Dayîka Aştîye Hatîce Durmuş dîyar kerd ke çimê înan mesajê Abdullah Ocalanî de yo û wina va: “Ma seba mesajê Birêz Abdullah Ocalanî şonê Amed. Werrekna o zî mîyanê ma de bibîyêne. Çimê ma rayîrê Birêz Abdullah Ocalanî de yo. Ma zaf bi kelacan ê, ma hêvîdar ê ke mesajê weş bêrê dayene.”

 

Umît Aşkin zî va: “Ewro rojêka tarîxî ya. Waştişê şarê Tirkîya aştîye ya. Vatişê birêz Abdullah Ocalanî semedê şarêk biqîmet o. Ma pêro zî bi kelecanêk pîl paweyê mesajî yê. Nê semedî ra zî ma şinê Amed.” 

Mîyanê kesanê ke ver bi Amedî kewtê rayîrî de merdimê kesan ke demê qedexeyanê vejîyayîşê kuçeyan a Cizîrî de dinyaya xo bedelnayê, merdimê hepsîyan û zaf kesê bînî est ê.