AMED - Hemverfeka Meclîsê Cinîyan ê DBP’yî Bêrîvan Bahçecî, dîyar kerd ke ê do bi wesîleya 8ê Adare 11 bajaran de atolyeyan organîze bikerê.

 

Hemverfeka Meclîsê Cinîyan ê Partîya Herêmanê Demokratîk (DBP) Bêrîvan Bahçecî, derheqê 8ê Adare Roja Cinîyan a Dinya de qezaya Rêzan a Amedî de buroyê partî ya şêwirmendîye de beyanatê çapemenîye da. Bêrîvan Bahçecî, babetanê qirkerdiş, tepiştiş û hepiskerdişê cinîyan de qisey kerd. Bêrîvan Bahçecî va, “Ma sey cinîyê DBP’yî, cinîyê ke bedel dayo, ma do qet destûr nêdê ke vengê şarî bêro birnayene. Ma do bibê vengê înan.”

 

‘Ganî azadîya fîzîkî ya Ocalanî bêra temînkerdene

 

Berîvan Bahçecî derheqê munaqeşeyanê prosesê neweyî de wina vat: “Cayê ke aştî yeno qiseykerdiş, tede domanî û cinîyî nêkişîyenê, sîyasetmedarî nêyenê tepiştiş. Êyê ke seba ziwan û kulturê xo bedel dayo nêyenê qirkerdiş. La ma rastê nînan yenê. Ma vînenê ke krîzê ekonomîkî çend xorîn o. Cayê ke tede şer est o, tede ekonomî zî nêbena, cinî û domanî yenê qirkerdiş, komele yena fetesnayene. Cayê ke tede tecrîd est o, nê çî ke mi vatî, pêro benê. AKP û hukmat nê sîyasetan domnenê. Ma vanê ke tecrîdo ke şexsê Rêzdar Abdullah Ocalanî de yo heme şarî ser o têsîr keno. Heta azadîya Abdullah Ocalanî nêbo, ma nêşenê behsê prosesêk bikê. Seba azadîya ey a fîzîkî ma do sey cinîyan xover bidê. Wexto ke azadîya fîzîkî ya Rêberê Şarê Kurdî temîn bibo, aştîyêka rûmetin do biba.”

 

‘Têkoşînê seserra cinîyan’

 

Berîvan Bahçecî dîyar kerd ke ê do seba seserra 21. biba “seserra cinîyan” xover bidê û wina dewam kerd: “Cinîyî çend rêxistin bibê hende eşkenê destkewtişan bidestfinê. Ma do zî sey Clara Zetkin, Leyla Qasim, Sara û Sêvêyan rêxistinbîyayîşê xo gird bikê. Ma do vera naye xover bidê. Ma do sey kesê ke alaya Leyla, Sêvê û Sarayan erdî de nêverdenê, xo rêxistin bikerê.”

 

Vera qeyûman reaksîyon

 

Berîvan Bahçecî, vera qeyyumanê ke yenê tayînkerdene reaksîyon nîşan da û wina vat: “AKP nêwazeno ke şarê kurd bi xo îdareyê xo bikero. Bêrîvan Bahçecî va: “Sîstem hertim wazeno ke cinîya kurde, şarê kurd bi mecbûrî şêro ey het. Ma seba nê qeyûman şermezar kenê. Çunke qeyûm, dizdî û xesbkerdiş o. Ma reyna vanê ke destê xo îradeyê şarî ra biancê. Ma do meşte reyna nê şaredarîyan şima dest ra bigîrê. Qeyûm çira talan o; karê verênî yê qeyûmanê ke yenê tayînkerdene hêrîşê cayanê cinîyan o. Heqanê cinîyan hedef gênê. Verê nê heqan qedexe kenê. Mudirîyanê cinîyan rê camêrdan tayîn kenê.

 

DBP do 11 merkezan de vejîyo meydan

 

Bêrîvan Bahçecî dîyar kerd ke ê do 8ê Adare de bi sloganê “Ma vera qirkerdişê cinîyan serewedarenê, azadîye awan kenê” meydanan de bibê û vat: “Seba ke cinîyî nêmirê, azade biciwîyê ma do meydanan de vengê xo berz bikê. Ma do sey Meclîsê Cinîyan ê DBP’yî 11 şaristanan de kuçe bi kuçe meydanan de bibê. Ma do Erzirom, Mûş, Sêrt, Şirnex, Dîlok, Meletî, Semsûr, Mereş, Çewlig, Bêdlîs û Stenbolî de atolyeyanê xo organîze bikê û do xo rêxistin bikerê. Ma heme cinîyan ke vanê ‘Ez do vera nê bêheqîyan têkoşîn bika’ dawet kenê, wa pê reng û vengê xo bêrê têhet. Ma do 8ê Adare de her ca de bibê vengê Pexşan Ezîzî, Werîşe Muradî, Şerîfe Muhammedî.”