AMED - Aktîvîsta ziwanê kurdkî Mîne Karataş derheqê 21ê Sibate Roja Ziwanê Dayîke ya Dinya de ajansê ma rê qisey kerd û mesaj û vengdayîşê xo yê semedê roja ziwanê dayîke wina vat: “21ê Sibate Roja Ziwanê Dayîke ya Dinya de ma venga pêro şarê xo kenê ke tutanê xo dir kurdkî qisey bikerê.”

 

Kurdî, Kurdistan û Tirkîya de se serrî yo semedê nasnameyê xo têkoşîn kenê. Destpêkê nê têkoşînî de waştişê şuxilnayîşê ziwanê dayîke bî. Pêameyîşê nê waştişî dir şarê kurdî û şarê ke paştdayîşê şarê kurdî kenê, bi serran têkoşînê xo yê semedê cuye û pawitişê ziwanê kurdkî de rastê hêrişê hukmat û dewletan ameyî. Na çerçawa de kurdî ameyî tepiştiş, îşkence, sirgûn û xeylêk problemî bînî ciwîyayî. La têkoşînê kurdan ê semedê pawitişê erjê xo, bi taybetî zî ziwanê xo, tu wext peynî nêbîyo û roj bi roje zêdeyêr beno.

 

Aktîvîsta Ziwanê Kurdkî Mîne Karataş çarçewaya 21ê Sibate Roja Ziwanê Dayîke ya Dinya de qisey kerd û derheqê hêrişê ziwanî ser û pawitişê ziwanî de ercnayîş kerd.

 

‘4 parçeyê Kurdistanî de polîtîkaya asîmîlasyonî dewam kena’

 

Mîne Karataş dîyar kerd ke bi serran o kurdan ser o polîtîkaya asîmîlasyonî yena kerdiş û wina vat: “Amancê parçekerdişê Kurdistanî, asîmîlekerdişê kurdan bî. Ma nê bi rehetî vînenê û eşkenê biercnê. Bi se serrî yo ke her çar parçeyê Kurdistanî de polîtîkaya asîmîlasyonî yena kerdiş. Bi hawayêk sîstematîk no yeno dewamkerdiş. Peymana Lozanî de Kurdistan bi parçeyan ame parçekerdiş. Planê Şark Islahatî ra heta nika çi heyf kurdî yenê asîmîlekerdiş. Wexto ke bêro waştiş şarêk bêro parçekerdiş, ewilî ziwan ra dest pêkenê. Wexto ke ziwan bêro girewtiş, destê înan de çîyêk nêmaneno. Semedo ke ziwan binhişê merdimî yo. Wexto ke ziwan bêro girewtiş, tu çîyêk şarî nêmaneno. Nê semedî ra rewşa ke nasname biciwîyê zî nêmaneno.”

 

‘Pêwa hêrişê ziwanê Kurdî aver şîyo’

 

Mîne Karataş dewam de wina vat: “No demo ke teknolojî aver şîya, destê her kesî de telefon est o. La teknolojî asîmîlasyon fîna sewîyeya tewr cor. Verê ziwanî de hêrişêk fîzîkî zî est o. Nimûne tîyatroyê kurdî her tim yenê qedexekerdiş. Metropolan de kesê ke kurdkî qisey kenê hêrişan dir yenê rî bi rî. Her hetî de çalakîyê ziwanî yenê qedexekerdiş. La averşîyayîşî zî est ê. Nimûne; nuştoxê kurdî berardişê xeylêk muhîmî vejenê werte. Weşangerîya kurdî nê hetî de aver şîya. Sazgehê ziwanî zaf şuxilyayî. Bêşik nê tena qîm nêkenê. Ganî tutan dir kurdkî bêro qiseykerdiş. Her keyeyêk ganî bibo mektebêk. Ganî dayîk û pî bi ziwanê dayîke tutan dir qisey bikerê. Bi no hawayî ma eşkenê ziwan bipawê.” 

 

‘Ganî şarê ma tutanê xo dir kurdkî qisey bikero’

 

Mîne Karataş peynîya qiseykerdişê xo de semedê 21ê Sibate Roja Ziwanê Dayîke mesajê xo bi nê vatişan pare kerd: “21ê Sibate Roja Ziwanê Dayîke ya Dinya de ma venga pêro şarê xo kenê ke tutanê xo dir kurdkî qisey bikerê.”