Derya Ren

 

MELETÎ – Meletî ke semedê erdlerzî zirarêk pîl dîbî,  her çend 2 serrî derbaz bî zî bi taybetî meseleya keyeyan de xeylêk problemî dewam ê û semedo ke xirbî bi hawayêk baş nêameyî wedaritiş problemê weşîye est ê. 

 

Serê erdlerzê ke 6ê sibata 2023ine de merkezê Mereşî pê ame û 11 bajaran rê tesîr kerd, 2 serrî derbaz bî. La hema problemê mexdûrê erdlerzî nêameyê çareserkerdiş. Goreyê dayeyê fermî, Meletî ke yew bajarê tewr zêde erdlerzî ra tesîr bîyo, hezar û 237 kesan dinyaya xo bedelnayî û 6 hezar û 444 kesî zî birîndar bîyî. Erdlerzo ke bi hezaran awanî û kargehî rijyayî de 35 hezar û 891 awanî xira bî. Heto bîn ra bi hezaran kesê ke semedê erdlerzî mecbûr mendî bajarê konteyniran de biciwîyê, semedo ke keyeyê înan nêameyê teslîmkerdiş, pêwa ke 2 serrî erdlerzî ser o derbaz bî zî hema têkoşînê cuye danê.

 

Bajar de heta nika wareyê weşîye de tedbîrê qîmî nêameyî girewtiş, doktorî dîyar kenê ke semedê lêşînîya hewayî nêweşîyê sîne zêde benê. Derheqê babete de Hemsereka Sendîkayê Kedkarê Weşîye (SES) ya Şubeyê Meletî Cansu Can û cinîyê mexdûrê erdlerzî JINNEWS'î rê qisey kerdî.

 

Zêdebîyayîşê nêweşîyê kronîkî

 

Hemsereka Şubeyê SES'î ya Meletî Cansu Can dîyar kerd ke bi 2 serrî yo tu başbîyayîşêk nêvirazîya yo û vat: "Semedê erdlerzî xeylêk xebatkarê weşîye mecbûr mendî ke Meletî terk bikerê. Hûmara kêmî ya xebatkarê weşîye, tesîrê negatîf resnayîşê şarî yê weşîye zî kerd. Sey nimûne; merdimî eşkenê aşmêke badê cû randevûyêk semedê MRI bigîrê. Rijnayîş û wedaritişê xirban bi hawayêk bêqanûnî yeno kerdiş û benê sebebê lêşînî yê hewayî. Çîyo ke ma weçînê, girêdayeyê ma yo. Semedo ke hema xeylêk kesî konteyniran de mendê, nêweşîyê epîdemîk zî zêde benê. Nêweşîyê kezebe de se ra 85 zêdebîyayîş est o. Nêweşîyê kronîkî çar qat zêde bîyê. Xêrcê nê, hûmara kesê ke muracatê beşê sîneyî zî kenê, roj bi roje zêde benê.”

 

'Doganşehir nêame tamîrkerdiş'

 

Medîne Dogan ke erdlerzî ra xilas bî, dîyar kerd ke pêwa 2 serrî erdlerzî ser o derbaz bîyo zî hema zî konteynir de manenê û wina vat: “Ez bi şert û mercê xo semedê xebate şina Meletî. Semedo ke Doganşehîr hema zî problemê ci nêameyê çareserkerdiş. Badê erdlerzî ma sey keye vila bî û yew mecbûr mend ke şêro cayêk. Ez mecbûr bena ke şêrî Meletî û wextê şîyayîşî de xeylêk zahmetî ancena. Ma nêeşkenê konteynirî de cuya xo dewam bikerê. Tena pereyê ceryan û awe ma ra nêgînê la gelo ê fikrîyenê ke ma şert û mercê başî de yê? Çi heyf çîyêk winasî çin o. Wexto ke ma nêweş kewenê, ma nêeşkenê meymanêk zî bigîrê. Semedo ke cayê ma çin o ke ma ê kesan rê nêeşkenê bica bikerê. Her çî yewbînan rê girêdaye yo.”

 

 'Ganî her kes bi hawayêk têduştî têbigiro'

 

Fatma Kubat ke erdlerz ra xilas bî zî vat ke ê derûdorêk baş de nêciwîyenê û vat, “Ez kîradar a. 2 serrî, ma mecbûr mendî konteynerî de bimanê. Hema banan teslîmê wayîrê banan nêkerdê. Ma nêzanê do key bidê kiradaran. Ganî bi hawayêkê têduştî nêzdîyê her kesî bibê.”