STENBOL - Şaro ke bi serran o bi polîtîkaya şer yeno îdarekerdiş, derheqê waştişê aştî û caardişê aştiye de qisey kerdî. Cinî ajansê ma rê qisey kerdî, dîyar kerdî ke ganî aştî pê bêro û gamê ke yenê eştiş zî samîmî bê.

 

Polîtîkaya şerî dir, şar mîyanê krîzo ke her roj kûr beno de têkoşînê cuye dano. Bi butçeyê ke semedê şerî yenê xerckerdiş, xebatkarî, ciwanî, tutî, cinî û teqawîtî hewl danê ke mehkûmê feqîrî bibê. Îhtîmalê aştî û çareserîya demokratîke ke hemverê nê pêrûnan pîl beno, semedê şaran bîyo hêvî. Sey JINNEWS’î ma mîkrofonê xo dergê şarê Stenbolî kerd ke wextê averşîyayîşê sîyasî de komel semedê aştî û çareserîya demokratîke çi fikrîyenê.

 

‘Semedê Tirkîya û herême demê aştîye yo’

 

28ê kanûne 2024ine de heyetê ke parlametnerê Partîya Têduştî û Demokrasî (DEM Partî) Pervîn Buldan û Sirri Sureya Onder mîyan de Abdullah Ocalanî dir pêvînayîş kerdî. Heyetî pêşnîyazîyê 7 madeyê Abdullah Ocalanî semedê çareserîye neql kerd, rayaumûmî dir pare kerd. Eşkerayîye de ame dîyar kerdiş ke Abdullah Ocalan semedê gama pozîtîf amade yo û venga ‘wa her kes paştdayîşê pozîtîf bido’ kerd û eynî wextî de îfadeyê ‘semedê Tirkîya û herême dem demê aştî û têduştî yo’ ca girewtî.

 

‘Çareserîya komelî’ 

 

Badê pêvînayîşê Abdullah Ocalanî dir heyetê DEM Partîye, partîyê sîyasî yê meclîsî dir û tepişteyê sîyasî Fîgen Yuksekdag, Leyla Guven, Semra Guzel, Selahattîn Demîrtaş û Selçuk Mizrakli dir pêvînayîş kerd. Hem partîyê sîyasî, hem tepişteyê agêrayî pozîtîf bî. Heyetê DEM Partîye, badê pêvînayîşan 22yê çele de ancî şî Îmraliyî. Badê agêrayîşî semedê şewatê Boluyî eşkerayîyêke nêame kerdiş û selahîyetdarê DEM Partîye agahîyê ke dayî ma îfadeyê sey, ‘Birêz Abdullah Ocalan semedê çareserîyêke mabêne îqtîdarî û Îmraliyî semedê çareserîya komelî amadekarîyan keno. Aştî û çareserî do komel de bibo û aver şêro’ ca ardî. 

 

Aştîyêke senîn?

 

Cinîyêke mîkrofonê ma rê qisey kerdî, dayî zanayîş ke yewin waştişê înan o yo ke lezkî şer peynî bibo û aştî pê bêro. Semedê persê ‘aştîyêke senî?’ zî wina vatî: “Semedo ke ma aştîyêke nêdîya, ma nêzanê aştî çîyêk senîn a.” Cinîyan dîyar kerdî ke prosesê bîyaye, nêaçaryayo prosesêk aştîye, zerrî ra nêvînenê û ganî gamê somutî bêrê eştiş.