AMED - Midûra Polîtîkaya Cinîyan ê Şaredarîya Peyasî Hediye Guneş Zenger da zanayîş ke kitabxaneyê Berardişê Cinîyan yê binê banê şaredarîye de ameyo akerdiş, tena kitabxane nîyo, wazenê ê biaçarnê Merkezê Hafizayî. 

 

Şaredarîya Peyasî ya Partîya Têduştî û Demokrasî (DEM Partî) qezaya Peyasî ya Amedî de Kitabxaneyê Berardişê Cinîyan Parkê 75î de akerd. Midûra Polîtîkaya Cinîyan ê Şaredariya Peyasî Hediye Guneş Zenger da zanayîş ke 2019ine de nê ser de munaqeşe kerdê û vat, do kitabxane tewr zêde aver berê.

 

‘Nimûneyê ci kêmî yê’

 

Hediye Guneş Zenger da zanayîş ke badê weçînayîşî yew hedefê înan yê tewr pîl wareyê cinîyan yê ameyê xespkerdiş û vat: “Ma nê weçînayîş de zî dîyar kerd. Amancê ma dima bidestkerdişê wareyê ke ameybî xespkerdiş bî. Kitabxaneyê cinîyan zî merkezê yadkerdişî yê cinîyan bi pêroyî wareyê xebata xoser bo. Stenbol de nimûneyê ci est ê. Dinya de nimûneyê ci zaf kêmî yê.”

 

‘Amanc bibo Merkezê Hafizeyî’

 

Hediye Guneş Zenger wina vat: “Ma wazenê xebatê derheqê cinîyan de çîyê ke ameyê nuştiş, bîyarê têhet. Na gama ma ya ewilî ya. Gama diyîn zî a ya ke bibo merkezê hişê cinîyan.”

 

‘Ma waşt ma serkêşî bikerê’

 

Hediye Guneş Zenger dewam de wina qal kerd: “Berardişî yenê çinkerdiş yan zî vînayîşê înan zaf kêmî yo. Ma ewro kitabxaneyan de gêrenê, çîyo ke bala ma anceno, kitabê camêrdan ê. Nê semedî ra zî ma waşt wareyêk xebate ê xoser cinîyan bibo. Ma nê fikrî aver berd. No fikr newe aver nêşî. 2019ine ra ma ser o fikrîyenê. Ma sey şaredarî waşt serkêşîya nê bikerê.”

 

Hediye Guneş Zenger tewr peyîn wina vat:: “Ma venga cinîyan, cinîyê ciwanî, meclîsê cinîyan, STKyan kenê. Kitabxaneyê Berardişê Cinîyan, kitabxaneyêk ra wetayêr Merkezê Hafiza yo. Wareyêk ke her kes eşkeno bifikrîyo û munaqeşe bikero. Nê semedî ra ganî her kes wayîr vejîyo û aver bero.”