DÊRSIM - Semedê Sakîne Cansiz Dêrsim de bernameyê yadkerdişî ame organîzekerdiş û bername de ame dîyarkerdiş ke do têkoşînê Sakîne Cansiz her cayî de dewam bikero. 

 

Awankerdoxa PKKyî Sakîne Cansiz (Sara), Endama Têgêrayîşê Ciwananê Kurdan Leyla Şaylemez (Ronahî) û Temsîlkara Kongreya Neteweyî ya Kurdistanî (KNK) ya Parîsî Fîdan Dogan (Rojbîn), 9ê Çeleyî serra 2013ine de paytexta Fransayî Parîsê ameyî qetilkerdiş. Sakîne Cansiz, 12ine serrgêra qetilkerdişê xo de awanîya Rêxistina Partîya Têduştî û Demokrasî (DEM Partî) yê Dêrsimî ameyî yadkerdiş. 

 

Verfeka Meclîsê Cinîyan ê Partîya Herêmanê Demokratîke (DBP) Bêrîvan Bahçecî, parlamentera DEM Partîye Ayten Kordu û Gulcan Kaçmaz Sayyîgît, temsîlkara partîyê sîyasî û sazgehî tewrê yadkerdişî bîyî. Yadkerdiş de fotografê cinîyê ke ameyî qetilkerdişî ameyî wedaritiş û sînevîzyon ame mojnayîş. 

 

Têkoşînê hemverê zîhnîyetê înkarî 

 

Parlamentera Dêrsimî Ayten Kordu yadkerdiş de qisey kerd û vatişê Abdullah Ocalanî yê “No qirkerdişê Dêrsimî yê diyîne yo” ard vîr û wina qal kerd: “Têkoşînê azadîye ya hevala Sakîne wayîrê ca û hewldayîşêk zaf muhîm o. Hevala Sakîne resnayîşê nê têkoşînî de xeylêk kede daya. Hevala Sakîne vatêne; 'cuya mi timî şer bî'. Hemverê zîhnîyetê ke şarê kurdî înkar û çin keno, têkoşîn kerd. Bi temamî canê xo da. Têkoşînê her 6 hevalanê ma, têkoşînê azadîye ya cinîyanê kurdan de wayîrê cayêk muhîm o.”

 

Badê yadkerdişî şar do şêro serê gorê Sakîne Cansiz ke Goristanê Asrî yê merkezê Dêrsimî de yo.