Neslîhan Kardaş

 

DÊRSIM - Dêrsim de cinîyan derheqê hêrişê hemverê elewîyanê Sûrîye de qisey kerdî û dîyar kerdî ke ganî tu kes hemverê hêrişan de bêveng nêmano.

 

Ameyox ra heta ewro hêrişê hemverê elewîyan de dewam kenê. Tarîx de qirkerdişê Çorum, Mereş, Dêrsimî pê ameyî û elewî ameyî qetilkerdiş. No dej hema teze yo û badê kewtişê rejîmê Baasî yê Sûrîye, welat kewt destê Heyet Tahrîr-El Şamî (HTŞ). Bi taybetî hêrişî Laskiye, Hama, Humus û Tartusî de hemverê elewîyan de ameyî kerdiş û ameyî qetilkerdiş. Hemverê nê de çalakî dewam kenê.

 

Dêrsim de cinîyan derheqê qetilkerdişê elewîyan de ercnayîş kerd.

 

‘Merdimayî qedîya ya’

 

Cinîya bi nameyê Sanîye Îldenîz wina reaksîyon mojnaye: “Merdimayî qedîya ya. Ez nêeşkena çekuyan bîyarî têhet û rewşe qal bikerî. Merdimî bîyê bêhêvî. Yê ke semedê herre şer kenê est ê. Yê ke semedê cîyakerdişê nijadî şer kenê est ê, yê ke semedê eşyayê dinya şer kenê est ê, la na dinya kesî rê nêmenda. Wexto ke Sûrîye de rejîmêk newe awan bikerê, do peynîya şerî bîyarê? Yê ke uca de qirkerdiş kerdî, ganî merdim bi tena bişewro. La no çî êdî teberê ma de yo. Semedo ke tu bawerî, hîs nêmendo. Ma do senî qal bikerê? Nê semedî ra kam ci? Nê semedî ra ez zî sey bêhêvî ewnîyena ameyox ra. Gama ke merdimayî qedîya ganî ma çi vajê? Na rey ma do şêrê înan bikişê û bibê sey înan? Ganî êdî însanî nêrê kiştiş û êdî ez xeylêk rey vîrameyîşanê xo vînî kena.”

 

‘Ma nê zulmî qebûl nêkenê’

 

Nadîde Dogmaz zî ard ziwan ke bi seserran o no zulm dewam keno û vat: “Çîyo ke Sûrîye de qewimyeno, ma qebûl nêkenê, ma hemverê nê de yê. Kilmî de ez eşkena vajî; RTÛK eşkeno medyaya dîjîtale de parekerdişan rê qedexe rono la nêzdîyê 15 rojî yo qetilkerdişê elewîyan her warî de yeno parvekerdiş. Pêro elewî nêrehet û endîşeyîn ê. Wexto ke ma ewnîyenê Rehaqî ra, sey kesêk ke na bawerî taqîb bikero, ma terefgirê kiştişê tu ganeyêk yê. Bawerîya xo de ma vanê; 'Yê ke cuye dano Homa yo û o do bigîro’. No qetlîam o, zilm û barbarî bi tu hawayî qebûl nêkenê. Hemverê qirkerdişan ganî pêro cuye bibo yew. Ziwan, dîn û nijad çi beno wa bibo, ganî her kes bibo yew û nê şerî ra vajo bes o. Şer xora çîyêk xirab o û nîno qebûlkerdiş. Mexdûrê tewr pîl yê şerî cinî û tut ê.”

 

‘Ganî reaksîyon bêro mojnayîş’

 

Raziye Oz zî bale ant serê xirabîyê şerî û vat: “Şer û qirkerdişan ra tewr zêde cinî tesîr benê. Nika rewşa Sûrîye de zî eynî çî ma ciwîyenê. Bêvengîya dinya hemverê qirkerdişî de ma keno endîşeyan. Ma nê hêrişan qebûl nêkenê. Ganî her kes reaksîyonê xo bimojno.”

 

Cinîya bi nameyê Sirma Tayan zî wina vat: “Çîyo ke  şeran de beno, yeno sereyê sivîlan zî. Ma vînenê ke Sûrîye de ancî qirkerdişî rî danê. Hemverê elewîyan qetlîamê merdimayî est ê. Ma na rewşe xususî sey elewîyêke şermezar kenê. Ganî her kes hemverê nê hêrişan de vengê xo berz bikero. Elewî uca de tena nîyê. Ma nêwazenê hemverê jenosîdê ke her cayê dinya de pê yenê bêhîsgêr bimanê. Ganî her kes bi rengêk reaksîyon bimojno."