MÊRDÎN - Ji bo bîranîna 12’yemîn salvegera Komkujiya Parîsê û nedayîna cenazeyên rojnamegerên hatin qetilkirin li Nisêbînê ber bi sînorê Qamişlo ve meşek hat lidarxistin. Dû re jî daxuyanî hat dayîn û hat diyar kirin ku dê têkoşîna her 3 jinan bidomînin. 

 

Têkildarî salvegera 12'yemîn qetilkirina Sakîne Cansiz, Fîdan Dogan û Leyla Şaylemez û nedayîna cenazeyên rojnameger Cîhan Bîlgîn û Nazim Daşdan li li navçeya Nisêbîn a Mêrdînê, bi pêşengiya Tevgera Jinên Azad (TJA) meş hat lidarxistin. 

 

Meşa girseyî ya ji Parka Aştiyê ya li navenda navçeyê ber bi sînorê Qamişlo ve dest pê dike Dayikên Aştiyê, Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogullari û parlamenterên DEM Partiyê beşdar bûn. 

 

Di meşê de jinan pêşmalkên "Jin, jiyan, azadî" li xwe kirin û wêneyên jinên li Parîsê hatin qetilkirin û rojnamevanên li Rojava hatin qetilkirin hilgirtin.

 

Girse bi dirûşmên "Bijî berxwedana Rojava", "Jin, jiyan, azadî", "Çapemeniya azad rûmeta me ye" ber bi sînor meşiyan. Meşa ku li Cadeya Lozanê bi dawî bû daxuyanî hat dayîn. 

 

Hevseroka MEBYA-DER'ê Gurbet Tekîn axivî û bal kişand ser berxwedanê. Piştre li ser navê TJA'yê aktîvîst Hatîce Oncu ku metna daxuyaniyê xwend, diyar kir ku ew ê li ser şopa jinên hatine qetilkirin têkoşîna xwe bidomînin û got: "Ji Sara heta Evîndaran, têkoşîna me ya bi Evînê re wê ti carî bi dawî nebe. Sara, Rojbîn, Ronahî, Sêvê, Pakîze, Fatma, Evîn, Nagihan, Cîhan peymana me ya azadiyê ne."

 

Piştre Parlamentera DEM Partiyê ya Mêrdînê Salîha Aydenîz axivî û diyar kir ku di sala 2013’yan de dema pêvajoya çareseriyê dest pê kir Komkujiya Parîsê pêk hat û wiha axivî: “Me dît ku piştî 13 salan zîhniyet neguheriye. Sedema vê kaosê jî çaresernekirina pirsgirêka Kurd e. Bi Komkujiya Parîsê re daxwaza aştî û azadiyê hat xwestin bê qetilkirin. Lê ji wê rojê û vir ve daxwaza azadiyê bêdeng namîne. Em ê bi têkoşîna xwe vê zîhniyetê paşve bixin û rêya hevalên xwe bişopînin. Heta em azad bibin em ê têkoşîna xwe bidomînin."

 

Piştre Hevseroka Giştî ya DEM Partiyê Tulay Hatîmogullari axivî û bal kişand ser astengiyên polîsan û wiha got: “Em ji bo rakirina van astengiyan û veguherîna welatekî demokratîk têdikoşin. Em ji bo bidestxistina hemû mafên destûrî yên welatiyekî têdikoşin. Em weke DEM Partiyê ji bo rê li ber têkoşîna azadiyê ya kedkar, kedkar, bindestan, mêtingeran û jinan vekin têdikoşin. Ez careke din tekez dikim: Em ji bo bidestxistina mafên xwe yên hemwelatîbûnê û mafên partiyên siyasî yên ku di destûrê de hatine diyarkirin têdikoşin. Lê mixabin îro ev rejîm careke din têk çûye û li pêşiya jinan barîkat kiriye.”

 

Tulay Hatîmogullari di berdewamiya daxuyaniyên xwe yên têkildarî Komkujiya Parîsê de jî wiha axivî: “Îro salvegera Komkujiya Parîsê ya 9’ê Çile ye. Tê bîra we, 12 sal berê li Parîsê Sakîne Cansiz, Leyla Şaylemez, Fîdan Dogan, 3 jinên kurd ên siyasetmedar hatin qetilkirin. Di sûîqestekê de hatin qetilkirin. Cihê mixabiniyê ye ku rastiya vê bûyerê ji raya giştî re nehatiye eşkerekirin û rayedarên ku Fransa jî di nav de ye, derbarê vê mijarê de daxuyaniyên pêwîst nedane. Ne tenê ev her sê jin gelek siyasetmedarên jin ên Kurd li her derê bûne hedef. Ji ber ku ev feraset, ev pergala serdest a mêr, bi dewletê re destê xwe dide kuştina jinan."

 

Tulay Hatîmogullari wiha dawî li axaftina xwe anî: "Ji ber ku em deynê xwe yê li hemberî vê erdnîgariyê dizanin, ji bo aştiyê li vir çêbibe em ê her hewl bidin. Ji vir heta aliyê din ê sînor peyameke me ya din jî heye: Ji bo pêkanîna aştiyê li Sûriyê her tiştî em ê bikin. Lê em ji vir dixwazin serî li hemû hêzan bidin. Em li vir bangî hemû civaka navneteweyî dikin: Divê her kes xwêya xwe ya erênî di vê şorbê de hebe. Em ê ti carî dev ji gotina aştiyê bernedin."

 

Piştî daxuyaniyê çalakiya rûniştinê hat lidarxistin.