Rabîa Onver

 

WAN - Sekretera Pêroyî ya PÎA Menîce Rumeysa Gulmez, derheqê vengdayîşê Rayberê Şarê Kurdî Abdullah Ocalanî de ercnayîş kerd û va: “Heta nika ma gamêke somut nêvîna. Na gama timî kurdan ra yena pawitiş. Wazenê kurdî xo feda bikerê.”

 

Rayberê Şarê Kurdî Abdullah Ocalanî bi hemkarîya heyetê Îmraliyî 27ê Sibate de "vengdayîşê seserre" yê sey "venga aştî û komelê demokratîkî" yeno binamekerdiş, kerd. Badê vengdayîşî vurnayîşê desturê bingehîn newe ra ame rojeve. Rayapêroyî hemverê vengdayîşî de gamanê hukmatî pawena. 

 

Sekretera Pêroyî ya Partîya Merdim û Azadîye (PÎA) Menîce Rumeysa Gulmez derheqê vengdayîşî de ercnayîş kerd.

 

‘Ganî gamî bêrê eştiş’

 

Menîce Gulmez da zanayîş ke bi serran o semedê ji aştîye têkoşîn kenê û vengdayîşê seserre dir gamê ke ameyê eştiş bi erc û muhîm vînenê. Menîce Gulmez wina va: “Gamê ke ameyê eştiş, semedê êdî kes nêmiro, tepişteyî bêrê veradayîş û vînîbîyayeyî werte ra wurzê, ameyê eştiş. Kurdî bi serran o semedê aştîye têkoşîn kenê. Ma PÎA na game muhîm vînenê. La ganî dewamê na game bêro. La çi heyf xêrcê çend gaman, sewbîna ma çîyêk nêvînenê. Qeyûm û tepiştişî dewam kenê. “

 

‘Ma bi şik ewnîyenê’

 

Menîce Gulmez wina dewam kerd: “Îqtîdar tena sey gama sîyasî paştdayîş dano proses. Ma kurdî wazenê gamê somutî bêrê eştiş. Şar game wazeno. Ma pratîkê dewlete ra ewnîyenê tu wext gamê samîmî nêameyê eştiş. Semedo ke wexto ke babete bena kurdî, gamê ke dewlete erzena, bi şik ê. Semedê nê prosesî, semedê aştî ganî her kes gaman bierzo. La ê wazenê tena kurdî xo feda bikerî. Her tim kurdî gaman pawenê.”

 

Menîce Gulmez tewr peyîn wina va: “Semedo ke samimîyetê prosesî bêro famkerdiş, ganî AKP-MHP gamanê somutî bierzo. Ganî sere de birêz Ocalan û tepişteyî bêrê tahliyekerdiş. Ganî peynîya caardişê qeyûman bîyarê. Ganî heqê ziwan bêro pawitiş. Ganî xebatê desturê bingehîn bêrê kerdiş. Ma îqtîdarî ra nê gaman pawenê.”