Melek Avci

 

ANQARA - Sekretera Neteweyî ya Polîtîkaya Mîyanneteweyî ya OSTA Mayka Solves Estaban va: “Xeylêk sendîkayî aştîye mîyanê karkeran de sey şertê verên vînenê. Şer goreyê sinifa karkeran û yan zî etnîkan vurîyeno. Aştî hemkarîya yewbîyayîşê karkeran asan keno.”

 

Sendîkayê pîlî yê Îspanya, Bask, Katalan, Galîçya û Endulusî û herêmanê bînan ra 15 sendîkayanê karkeran vengdayîşê Konseya Ewropa kerd û vat ke ganî seba Rayberê Şarê Kurdî Abdullah Ocalanî heqê hêvî bêro ca. 27ê Nîsane de sendîkayan bi logo û îmzeyanê temsîlkarîya xo name şirawit Konseya Ewropa û vat ke ganî seba Rayberê Şarê Kurdî gamêka eşkere bêra eştene.

 

Sekretera Neteweyî ya Polîtîkaya Mîyanneteweyî ya OSTA ya Rêxistina Sendîkal a Karkerê Aragon ke îmze eştbî, Mayka Solves Estaban derheqê babete de qal kerd.

 

Mayka Solves Estaban eşkera kerd ke sey sendîka xebatanê xo ver bi pawitişê heqê merdiman hîra kerdî û va mekanîzmayê mîyanneteweyî yê sey Konseya Ewropa nê prosesî de eşkenê rolêko muhîm kay bikerê. Mayka Solves Estaban wina va: “Ma zextanê cimatî nîşan danê û nûfûsa xo xebitnenê. Mekanîzmayê mîyanneteweyî eşkenê rolêko muhîm kay bikerê. Konseya Ewropa eşkena dîqet bianco serê heqê merdiman. No zî bedelê sîyasî hewce keno.”

 

‘Ganî îradeyê sîyasî bibo’

 

Mayka Solves Estaban eşkera kerd ke sey deklarasyonê hemkar de zî ameyo dîyar kerdene, seba aştîye îradeyêko sîyasî hewce yo û va: “Heta îradeyêko sîyasî yo hîra çinîbo aştî zî nêbena û ne diyalog ne zî aştî aver nêşêna. Çîyo ke hewce yo, peymanê raşt û cesûr ê. Aştî, bi peymananê cesûr û raştan eşkena bêra viraştiş. Îrade û berpirsîyarîya sîyasî, îstîkrar hewce keno.”

 

‘Bêaştîye heqê xebatê yê muhîmî zî çinî yê’

 

Mayka Solves Estaban semedê ke ganî sendîkayî paştî bidê aştîye zî wina va: “Şertê xebate bi îzolebîyayîşî nêbenê. Babetê dewaya kurdî de têkilî eşkera ya; Bêaştîye heqê xebat û karî yê muhîmî zî çinî yê. Sendîkayî tenê meaşê xo nê, azadî û rêxistîbîyayîşî zî pawenê. Problemê kurdî eynî wext de naskerdîşê heqanê sîyasî, kulturî û ziwanî zî tede geno. Heta no naskerdiş çinîbo, kurdê ke hetêk ra sinifa karkeran de yê bêîmkan manenê. Semedê nê, xeylêk sendîkayî aştîye mîyanê karkeran de sey şertê verên ê têduştîye vînenê. Şer goreyê sinifa karkeran û yan zî etnîkan vurîyeno. Aştî hemkarîya yewbîyayîşê karkeran asan kena.”