MERKEZÊ XEBERAN - Zext û hêrişê rejîmê Îranî yê hemverê cinîyan de dewam keno. Eynî çerçawa de Sine de cinîyêke ameye tepiştiş û zîndanê Evîne de di tepişteyê cinî nînê dermankerdiş.

 

Malpera Vengê Tepiştişê Kurd û Îranî neql kerd ke cinîyêka kurde bi nameyê Şeyda Ezîzî ya şarê Sine ya Rojhelatê Kurdistanî hetê Dadgeha Şorişî ya Sineyî ra bi tometê "hewldayîşê semedê xirabkerdişê asayîşê neteweyî" hîrê serrî cezaya zîndanî rê ameye mehkûmkerdiş.

 

Ame dîyarkerdiş ke Şeyda Ezîzî demê şerê 12 rojî yê Îran û Îsraîlî de Sine de bêfermanê dadwerî amebî destbendkerdiş û berdîyabî zîndanê bajarî.

 

Eynî wextî de ame neqlkerdiş ke tepişteyê cinî yê siyasî yê zîndanê Evîne bi nameyê Merziye Farisî û Ferûx Teqî Pûr problemê fîzîkî dir rî bi rî yê û nînê dermankerdiş.