STENBOL - Sereka Heyetê Îdareyî ya Komeleya Derûdorî ya Munzurî (MÇD) Hatun Esen hemverê talanê xozaya ke Kurdistan de beno, vengdayîşê yewîye kerde û wina va: “Senîn ma yew benê û şênê şaristananê Tirkîya, ganî ma bibê yew şêrê cografyaya Kurdistanî zî. Ganî ma wayîrê hemine vejîyê.”

 

Bi serran o Kurdistan, Tirkîya û dinya de kapîtalîst û emperyalîstî xoza qetil kenê. Tirkîya de demê peyênan de bi qanûnê 7554î talankerdişê xoza her ke şino giran beno. Nê talanî tesîrê negatîfî cuya ma ser o kenê.

 

Sereka Heyetê Îdareyî ya Komeleya Derûdorî (MÇD) Hatun Esen derheqê babete de qisey kerde.

 

Hatun Esen da zanayîş ke Tirkîya de şîrketê emperyalîstî xoza çin kenê û dimayê ke qanûnê 7554î meclîsî ra derbas bî talan zêdeyêr bîyo. Hatun Esen dîyar kerd ke ê semedê qanûnê 7554î şîyê meclîsî û va têkoşînê ekolojîye tena bi burokrasîye nê, kolanan de zî eşkeno bêro kerdiş. Hatun Esen hemverê talanê xoza de vengdayîşê yewîye û awankerdişê bendî kerd.

 

‘Têkoşînê ekolojîye têkoşînê serê sîyasetî de yo’

 

Hatun Esen dîyar kerd ke Madenê Koza Altin demêko derg o Çemê Muradî yê Giyadînî yê Agirî ser o madenê zerdî vecenê û wina va: “Merdimê ucayî semedo ke her tim mîyanê şerî de ciwîyayê, nêfikirîyayê ke rijnayîşêk ekolojîk do înan erdê înan ra bikero. Belkî ma şîyê uca û ma hişmendîyêk awan kerd. Kurdistan de zordarîya dewlete zêde bîyê. Şar pawitişê xoza de endîşeyê giranan ciwîyeno. Ganî têkoşînê ekolojîye vera ke cîyakarî bikewo mîyanê herêman bêro kerdiş. Bi serran o çekê kîmyewî erzenê xozaya Kurdistanî. Awe lêşin bî, daristanî ameyî veşnayîş, dewî ameyî vengkerdiş, zozanî ameyî qedexekerdiş, awbendî ameyî viraştiş. Heskîf mîyanê tarîtîye ame fetisyayîş. Gunayê nê serê ma heminen de yo. Semedê nê zî têkoşînê ekolojî sîyasetî ser o. Ganî ma nê têkoşîni pîya bimûnê. Dejê dara ke Akbelen ke yena birnayene, ganî semed yê Cudî zî yena birnayene bêro hîskerdiş.”

 

Tesîrê talanê xoza

 

Hatun Esen dîyar kerd ke Kurdistan de netîceyê xebatanê hişmendîye de welatijan waşto ke madenî bêrê padayîş û va: “Semedê madenan heywanê şarî nêweş kewenê, nêwazenê erdê xo ra vecîyê. Hînî mecbur mendî ke erdê xo biroşê û zaf xemgîn benê. Semedê nê zî vanê çira şima ma rê rew malûmat nêda. Dêrsim, Şirnex, Mêrdîn yan zî Cudî erdê nê welatî nîyê? Wexto ke no şar koçber beno, nêeşkeno şaristananê girdan de biseteryo.”

 

‘Herrî bi se serran nîna xo ser’

 

Hatun Esen dîyar kerd ke Tirkîya de 24 madenê zerdî yê sîyanurî est ê û wina domna: “Ganî ma heme yew bibê û nê madenan bidê padayîş. Emperyalîst û kapîtalîstî semedê xoza welatanê feqîran de çin bikerê kewtê musabaqa. Berardeyê nuklerî û madenan texrîbatê girdî viraştî. Herra ke madenê zerdî ci ra vecîyenê nîna rehabîlîtekerdiş. Semedo ke na herrî bêro xo ser, ganî se serrî ra zêde derbas bibo.”

 

Vengdayîşê bernameyî

 

Hatun Esen ard ziwan ke 6ê kanûnî de Merkezê Kulturê Cemîl Candaşî yê Şîşliyî de bi sloganê, ‘Hemverê Îşxalkerdişê Herre û Talankerdişê Emperyalîstî Têkoşîn! Herre de Kokê Ma, Xoverdayîşî de Hêzê Ma Est o!’

 

do bernameyêk virazê. Hatun Esen venga heme rêxistinanê ekolojîkî, şar û dostanê xoza da ke tewrê nê bernameyî bibê û wina peynî ard: “Na roje roja têkoşînî ya. Semedo ke demê peyênan de hevalê ma yê ekolojîstî, yê ke xoza pawenê hedef de yê. Ganî êdî na sîwane ma ya rêxistinbîyayîşê ekolojîye tewr zêde xurt û çalak bibo. Senîn ma yew benê û şêrê şaristananê Tirkîya, ganî ma bibê yew şêrê cografyaya Kurdistanî zî. Her herre, her awe, her ko yê ma yo. Ganî ma wayîrê hemine vejîyê.”