Şehrîban Aslan

 

AMED - Ceylan Yildirim dimayê erdlerzî karê xo vînî kena û dest bi arêdayîşê naylonan kena. Ceylan Yidirim dîyar kerd ke bi nê karî debara xo kena û pêwa zor û zehmetîyan karê xo dewam kena.

 

Kurdistan de semedê polîtîkaya dewlete tesîrêk negatîf cuya şarî ser o beno. Bi taybetî zî cinî xeylêk tesîr benê. Cinîyê hetê ekonomî de probleman ciwîyenê, semedo ke debara xo bikerê kewenê mîyanê hewldayîşan. Ceylan Yildirim (37) heta nîmeyê şewe kuçeyan ra yan zî çop ra naylonan kom kena. Ceylan Yildirim ke Rezanê Amedî de ciwîyena, dîyar kerd ke na rewşe her hetî ra aye dana zorî.

 

Ceyla Yildirim derheqê karê ke kena de ajansê ma rê qisey kerd û hîkayeya aye tesîr merdiman rê kena.

 

Erdlerz de mêrdeyê xo vînî kerd

 

Ceylan Yildirim 2023ine de firinêk de sey xebatkara pakitî şuxilêna û rojane 700 TL qezenc kena. La dimayê erdlerzî girdî 2023ine 40 rojî nêşina kar û nê semedî ra karê xo vînî kena. Ceylan Yildirim semedê problemê ekonomî dest bi arêdayîşê naylon û kartonan kena. Ceylan Yildirim wina va: “Mi roje de 60 TL qezenc kerdêne. La qîmê çîyêk nêkerdêne. 5 tutê min est ê. Dima ra mi dest bi arêdayîşê naylonan kerd. Bêşik ê zî zêde nîyê la kartonan ra başêr ê.”

 

Saetê şewe de naylonan arê dana

 

Ceylan Yildirim dîyar kerd ke şewe şina naylonan arê dana û sebebê ci zî oyo ke merdimê aye nêvînê û va: “Ez mecbûr a nê karî bikerî. Ez tutanê xo rê ewnîyena. Sebebê na rewşa mi krîzê ekonomî yo. Hîn cayê xo de nişnenê ro û bi mîlyonan qezenc kenê la hîn zî bi şewe û roj semedê nanê xo xebityenê.”

 

Ceylan Yildirim hîkayeya xo wina va: “Di serrî û nîm o nê karî kena. Rojane 100 TL, reyna 200 reyan zî 300 TL qezenc kena. Bi şewe heta erey naylonan arêdana. Serê sibayî zî amade kena û roşena. Ez naylonan kena paştayîya xo û bena roşena."

 

'Ma wareyê xo de bî parsek'

 

Ceylan Yildirim dewam de wina va: "Ma bajarê xo, herra xo ser bî parsek. Wexto ke kewena mîyanê çopî şerm kena. Merdimî ewnîyenê mi ra û vanê karêk bîn çin o ti bikerê? Reyan yeno sewîyeya tacîzî. La ez bi karê xo serberz a. Paştîya mi de  fitiq est o. Ganî çîyanê giranan nêwedarnî. La ez mecbûr a. Ez tuta xo ya qije xo dir bena. Yê apartmane de nêştêne ro nêwaştêne ez naylonan bîyarê apartmane. Wexto ke mi newe arê da, tutê mi çend rey nêweş kewtî, enfeksîyon girewtî. Doktorî va, çira hende enfeksîyon girewta. Mi va, ez mecbûr a tutê xo xo dir berî. 5 tutê mi est ê. Her karê xo ez kena. Ne şewa mi est a, ne roja mi est a. Kesî ra pabebîyayîşê mi çin o. Ez bi karê xo serberz a. Wa cinî linganê xo ser vinderê."

 

'Travmaya min a tewr pîl tutîya min a'

 

Ceylan Yildirim tewr peyîn wina va: "Travmaya min a tewr pîl tutîya mi bî. Babîyê mi tutanê kênayînan ra hes nêkerdêne. Lajan ra hes kerdêne. Mi tim nê persayîne. Ez zaf xemgîn bîne. Ez pîl bîya zî no sey  birînêk zerrîya mi de yo. 15 serrû de min kesêk nas kerd û remaya, zewicyaya. Tutê min ê ewilî virazyayî û merdî. Mêrdeyê mi û keyeyê ey zulmêk pîl mi rê kerdî. Wexto ke ma newe zewicyayî çîyêk ma çinbî. Min çop ra çîyan ardêne û şuxilnayîne. Nivînî, xalî, çi bibayîne. Keyeyê mêrdeyê mi tu wext nêbî hetkar.”