Gulîstan Gulmuş

 

AMED - Dayîka Rojîn Kabaîş, Aygul Kabaîş qetî kerd ke 9 aşmî yo mergê şikin yê Rojîn Kabaîşe de tu averşîyayîş nêbîyo û ê hema zî persenê gelo çi qewimîya yo û va, "Ma wazenê nika hîn agahîyan bigîrê, bizanê ka çi qewimîya yo û asan bibê. Ma 24 saetan Rojîne ser o fikrîyenê."

 

Rojîn Kabaîşa 21 serrî Amed ra bî, Zanîngeha Yuzuncu Yilî ya Wanî de dest bi wendiş kerd. Roja 27ê êlule 2024ine de bi hawayêk şik vînî bî û agahî ci ra nêamî girewtiş. Cenazeya aye dimayê 18 rojan qeraxê Behrê Wanî de verê dewa Mele Qasimî de ame vînayîş.

 

Rojîn Kabaîşe Wargehê Kênayan ê Seyîd Fehîm Arvasî yê Wanî de mendêne. Hema çend rojî bî aye şîbî zanîngeh. Dima ra agahîya vînîbîyayîşî keyeyî rê amî. Pêwa ke 9 aşmî vîndîkerdişê Rojîn Kabaîşe ra derbaz bîyo zî hema zî tu şikê mergê aye ser werte ra nêwuştî.

 

New aşmî mergê şikin yê Rojîn Kabaişe ser o derbaz bî û dayîka aye Aygul Kabaîş cigêrayîşê edaletî de ya û raştîya ke mergê şikdar ê Rojîn Kabaişe hema nêameya çareserkerdiş, JINNEWS’î rê qisey kerd.

 

‘Qey kênaya mi se kerdibî?’

 

Aygul Kabaîş dîyar kerd derheqê mergê kênaya aye de averşîyayîşêk çin o û va, “Heta nika kesî çîyêk ma ra nêvato ka çi qewimyayo. Ma hewteyêk verê betlaneye şîyî Wan û 3-4 rojî uca dr mendî. Ma uca de bi dozgerî û avûkatan dir pêvînayîş kerd, tena çîyêk ma ra vatî, do testê DNA'yî bişirawê Stenbol. Înan va ke ê eşkenê goreyê cewabo ke uca ra girewtê agahdarî bidê ma. Ma paweyê ke ê xeberanê başan bidê ma. Kênaya mi bi keyfweşî şî dibistane. Aye bawer nêkerdêne ke do bikewo dibistane la no çî ame sereyê aye. Ma wazenê nika bizanê ke ka çi qewimya. Eke ma çîyêk bimusê, ma do rihet bibê. Kamî kerd ganî nêeşko bi hawayêk azad teber ra bigêro, qey kênaya mi se kerdibî?”

 

'Ma bizanê ka çi qewimya yo'

 

Aygul Kabaîş qalê têkiliyê xo kênaya xo dir kerd û va: "Min û Rojîne ma pîya kerdêne. Aye rojêke qelbê mi nêşikina. Heta ke ez sax bî, aye do hişê mi ra derbaz nêbo. Pêro cinî zaf nêzdîyê mergî yê. Semedo ke kiştoxî nînê cezakerdiş. Eke aye biameyîne cezakerdiş, do ewro çîyêk winasî nêvirazyayîne. Înan tena hewteyêk tepişnenê û dima ra zî vera danê. Nê semedî ra nê qirkerdişî zêde benê. Rojîne her tim mi ra vatêne, 'Dayê, çokê to dejenê, ez o puncanê to bikerî linganê to.' Aye rojêke zî mi aciz nêkerd. Ma wazenê nika agahiyan bigîrê, bizanê ka çi qewimîya yo û rihet bibê. Ma 24 saetî Rojîne ser o fikrîyenê.”