Neslîhan Kardaş 

 

WAN - Devlet Çiftçî, dayîka endama HPG'yî Cemîle Çiftçî ke pêrodayîşêk de dinyaya xo bedelnaye ser o va, "Ma wazenê aştî pê bêro. Ma wazenê bi ziwanê xo qisey bikerê. Ma nêwazenê êdî dayîkî hêsiran bivarnê."

 

Keyeyê endama HPG'yî Cemîle Çiftçî (Amara Rojbîn) ke pêrodayîşê serra 2021ine de Koyê Cûdî yê Şirnexî de dinyaya xo bedelnaye, paştdayîşê xo yê semedê prosesî ard ziwan û waştişê xo yê semedê aştîye ard ziwan.

 

'Aye waştêne ke biba avûkate'

 

Dayîka Cemile Çiftçi, Devlet Çiftçi, va ke kênaya aye  her tim zaf jîyatî û zana bîya û va, "Wexto ke aye dibistan de bî, aye waştêne ke biba avûkate. Labelê, vernîya ke dibistana mîyanên biqedêna, tewrê PKK'yî bî. Aye zaf jîyatî û rêzdar bî. Aye mîyanê çar tutanê mi de tuta tewr jîyatî bî. Aye her tim keye de xeylêk hetkarîya mi kerdêne."

 

'Amara a roje keye ra vejîya û reyke bîn anêgêra'

 

Devlet Çiftçi dîyar kerd ke kênaya aye her tim waştêne dimayê ke pîl bibo tewrê PKK'yî bibo û va, "Aye roja îne keye ra vejîya û şî. Vernîya ke şêro, aye ma rê arayî viraşt û va ke do şêro tirşî. Varan newe vindertibi. Amara solê xo yê neweyî yê sporî kerdibî xo pay. Mi ci ra va, sporanê xo neweyan meke xo pay la aye va ke do cade abigêro. Amara a roje ra keye ra vejîya û reyke bîn anêgêra."

 

'Ma aye bi 10-15 kesan nimina'

 

Devlet Çiftçî dîyar kerd ke kênaya aye zaf zana û kedkar bî û va, "Aye xo zaf aver berdebî. Roja ke aye tewrê PKK'yî bî roja îne bî û roja îne zî ma xebera şehadetê aye girewt. Roja îne zî înan destûr da ke ma cenazeya aye bigîrê. Wexto ke ma cenazeya Amara girewtêne, aye her tim Şirnex ra pey mi ra ameyîne tîya. Şirnex ra ma ameyî Eruh, uca ra ameyî Sêrt, dima ra zî ameyî Bedlîs, Tetwan û Wan. Înan merasîmê cenaze de semedê ma zaf zehmetî vet. Înan heta nêverda ke keye bêro serê gorê aye. Ma aye tena bi 10-15 kesan nimina."

 

'Hêsirê ma rijîyayî, wa hêsirê dayîkê bînan nêrijê'

 

Devlet Çiftçi tewr peyîn va; "Ganî êdî zerrîya tu dayîkêke nêveşo, wa hêsirê bînî nêrijê. Ma wazenê aştî bêro. Ma wazenê bi ziwanê xo qisey bikerê. Ma nêwazenê êdî hêsirê tu dayîkêke birijîyê. Ez hêvî kena ke aştî tewr lez bêro. Hêsirê ma rijîyayî, wa hêsirê dayikê bînan nêrijê. Ma yewîye û aştîye wazenê."