MERKEZÊ XEBERAN - Bajarê Hesekê Herêma Bakur û Rojhelatê Sûrîye de bi seyan kesî semedê azadîya Rayberê Şarê Kurdî Abdullah Ocalanî rayîrşîyayîşêk organîze kerd.

 

Bajarê Hesekê de bi seyan kesî bi waştişê azadîya fîzîkî ya Rayberê Şarê Kurdî Abdullah Ocalanî rayîrşîyayîşêk girseyî organîze kerd. Şedad, Til Temir, Til Birak, kampê Waşûkaniyê, Serêkanî û Holî ra xeylêk kesî beşdarê rayîrşîyayîşî bîyî. Girse fotografê Abdullah Ocalanî berz kerd. Rayîrşîyayîş cadeyê Kevokî de dest pêkerd.

 

Rayîrwanî heta cadeyê Şehîd Serhedî yê taxa Miftî rayîr ra şî. Uca de badê deqeyêk rêzgirewtişî de hemsereka Meclîsê Bajarê Hesekî Xatûn Îsa qisey kerd. Xatûn Îsa, bale ant serê têgêrayîşê dîplomatîkî yê cinîyan ên bi armanca azadiya fîzîkî ya Abdullah Ocalan û va do heta caardişê nê armancî têkoşîn bikerê.

 

Rayîrşîyayîş bi berzkerdişê sloganê "Bijî Serok Apo" peynî bî.