Pelşîn Çetînkaya

 

AMED- Armancê paştdayîşê tewrbîyayîşê aktîf ê komelî yê tutan û sewbîna semedo ke tutî bibê merkezê cuya komelî Meclîsê Tutan ame akerdiş. Meclîsî dir do tutî fikr û ewnîyayîşê xo bi hawayêko azad îfade bikerê.

 

Bi serkêşîya Konseyê Bajarî yê Amedî û Torra Heqê Tutan ê Amedî, Amed de bi armancê xoresnayîşê tutan ê wareyê komelî, kultur û îstîmlakî de û eynî wextî de semedo ke bibê merkezê cuye Meclîsê Tutan ame awankerdiş. Dekleraysonê meclîsî 5ê gulane 2025ine de merkezê Kongreye ya Kulturê Amedî de pê ame. Awankerdişê meclîsî dir do tutî babetan de bi hawayêko azad qerar bidê.

 

Verfeka Torra Heqê Tutan ê Amedî avûkate Berfîn Elçî derheqê Meclîsê Tutan de qisey kerd.

 

‘Do tutî qerarê xo bidê’

 

Berfîn Elçî dîyar kerd ke tutî merkezê cuye de yê û bajaran de qerarê tutan, heqê tutan yeno peyhoşkerdiş û va: “Heta nika tewrbîyayîşê tutan ê qeraran ameyîne peygoşkerdiş. Dimayê texrîbatê 10 serran ê qeyûman konseyê bajarî bêtesîr mend û meclîsê tutan zî çinbî. Heqê vatişê tutan çinbî û tewrbîyayîşê qeraran amebî peygoşkerdiş. La nê meclîsî dir tutî hîna bi çalak bê. Dimayê amadekarîyêk pîl no meclîs ame awankerdiş. Ma semedê nê meclîsî hewldayîşêk pîl da. Proses Torra Heqê Tutan ê Amedî dir ame kerdiş.”

 

‘Meclîs de tena tutî ca gênê’

 

Berfîn Elçî dîyar kerd ke meclîs de tena tutan ra awan beno û wina qedêna: “Do tena tutî meclîs de ca bigîrê û tewrbîyayîşê înan aver şêro. Tutî do qerarê xo bi xo bidê. Do bêrê têhet û qerarê xo bidê. Qerarê xo do konseyê bajarî rê neql bikerê û kesê ke konseyê bajarî yê zî do goreyê qeraran têbigêrê.”