Berîtan Canozer

 

MERKEZÊ XEBERAN - Wareyê mîyanneteweyî vengdayîşê 27ê Sibatê yê Rayberê Şarê Kurdî Abdullah Ocalanî pozîtîf pêşwazî kerd û paweno ke Tirkîya hemverê vengdayîşî de gamêke bierzo.

 

Rayberê Şarê Kurdî Abdullah Ocalanî 27ê Sibate de ‘vengdayîşê aştî û komelê demokratîkî’ kerd û dimayê nê PKK’yî mabêne 5-7ê gulane de kongreya xo ya 12ine viraşt. PKK’yî netîcenameyê xo pare kerd û dîyar kerd ke peynîya têkoşînê çekdarî ardê.

 

Tesîrê vengdayîşî Tirkîya û Rojhelatê Mîyanên de dewam keno. Bala pêro rayaumûmî averşîyayîşê prosesî ser o.

 

Endama Meclîsê Parlamentere ya Konseya Ewropayî Laura Castel, qerarê feshkerdişî yê PKK’yî pîroz kerd û va: “Nika ganî dewlete semedê prosesêk raştî yê aştîye gamê pozîtîfî û manayîn bierzo.”

 

Laura Castel dîyar kerd ke qerarê PKK’yî muhîm o û tarîxî yo û wina va: “Nika semedê aştîye û ameyoxê şarê kurdî ganî Tirkîya bikewa mîyanê têgêrayîşî. Konseya Ewropayî yan zî sazgehê NY’yî, kam beno wa bibo ganî Yewîya Ewropa her di hetan de ca bigîro û belkî bi nê mabênkerî de proses asan bibo. Ganî semedê aştîye paştdayîşê her di hetan bêro kerdiş.”

 

‘Ganî Tirkîya lezkî gaman bierzo’

 

Avûkata Heqê Merdiman a Mîyanneteweyî Margaret Owen ke bi dostanîya xo ya kurdan û xebatê semedê PKK lîsteya "terorî" ra vejîyo yena zanayîş, semedê Abdullah Ocalanî sipasîyê xo kerd û wina va: “Ganî Tirkîya lezkî gaman bierzo. No proses semedê pêrûne muhîm o. PKK’yî kombîyayîşê xo yê 12ine pê ard û qerarê peynîkerdişê faliyetî çekdarî û feshkerdişî da. Nê pêro badê vengdayîşê Abdullah Ocalanî ameyî kerdiş. La nika dore Tirkîya ya. Dora parlamento ya. Ganî Abdullah Ocalan bêro veradayîş ke pêvînayîşê aştîye bêrê kerdiş. Rayapêroyî bi mereq pawena ke do Erdogan se bikero. Ma do heme pîya bivînê. Ma semedê Ocalanî sipasîyê xo kenê. Ganî lezkî bêro veradayîş.”

 

‘Ganî Tirkîya goş bido PKK’yî’

 

Aktîsta South Hall Black Sister, Rahila Gupta zî wina va: “Vengdayîşê semedê çareserî ganî bi keyfweşî bêro pêşwazîkerdiş. Ez sey kesêk ke paştdayîş dana têkoşînê kurdan qisey kena. Şarê kurdî bi serran o semedê nasname, cuyêka azad bedelê giranî da. Abdullah Ocalan zanyarêk pîl o. Şarê kurdî rêzdarîyêk pîl mojneno. Analîzê ey yê semedê sîyasetê dinya û Rojhelata Mîyanên xeylêk xurt ê. Ez venga hukmatê Tirkîya dana ke goş bidê vengdayîşê PKK’yî. Semedê cuyêka aştîyane xeylêk muhîm o.”