AMED - Cinî xêrcê têkoşînê cuye, mecbûr manenê têkoşînê ekonomî zî bidê.

 

Kurdistan û Tirkîya de semedê problemê ekonomî hetê vînayîşê karî de zî zehmetîyê pîlî yenê ciwîyayîş û alternatîfek bîn ê xebate semedê cinîyan çin o. Cinî her wareyî de bêtêduştîya cinsî dir yenê rî bi rî, wareyê karî de zî eynî zor û zehmetîyan ciwîyenê.

 

Cinîyê ke xêrcê xebatê alternatîfê înan çin o, probleman ciwîyenê ajansê ma rê ercnayî.

 

‘Her tim wazena berardiş bikerî’

 

Yew cinîya ke problemê ekonomî ciwîyena Dîlan Çerçel a. Dîlan Çerçel (26) Îzmîr de ameya dinya û pîl bîya, Amed de zî cil û belgê adetî derznena. Dîlan Çerçel wina vana: “Ez Îzmîr de ameya dinya, pîl bîya. La ma Amed ra yê. Dayîka mi deştiş kena, babîyê mi esnaf o. Ez tutîya xo ra nê karî kena. Mi her tim deştiş mereq kerdêne. Her tim wazena berardiş bikerî. Hîrê serrî yo nê karî kena. Serrêke yo Amed de dikanê mi est o. Ez cil û belgê kurdî derznena.”

 

‘Ganî her cinîyêke serkewte bo’

 

Dîlan Çerçel dewam de wina va: “Ez beşê diyalîzî ra mezûn bîya. La nêameya tayînkerdiş. Nê semedî ra zî nê karî kena û ekonomîya xo bi dest kena. Ganî her cinî linganê xo ser o vinderê. Ez semedo ke muhtacê kesî nêmanî nê karî kena. Ma eşkenê cilanê modernan zî biderznê. La ma xususî cilanê û belganê kurdan derznenê. Ez wazena kulturê xo aver berî. No semedê mi motîvasyonêk pîl o. Ez dinyayêka bihizûr wazena.”

 

‘Ez hes kena berardiş bikerî’

 

Roza Sonkurt Dalli zî va, hetê ekonomî ra probleman ciwîyenê û va: “Mi alternatîfêk vîna. Nê meslegî 4-5 serrî ra kena. Mi tutîtî de deştiş ra hes kerdêne. Babîyê mi mamoste bî. Senî ke mereqê mi vîna, ez şirawita kursê meslegî. Mi dibistana mîyanên de semedê dersa xo eteke deşt. Babîyê mi nê hetê mi vîna û mi şirawit kursan. Mi keyeyê xo dir dest bi nê karî kerd. Dimayê ke ez zewicyaya merdimêk ma va dikan abikere. Mi zî dikan dî û akerd. 16 serrî yo nê karî kena. Mi tu wext sere nêtewêna, mi têkoşînê xo dewam kerd. Ez tutanê xo ra zî vana; tu wext xo medê kîşte, peyser game meerzê û têkoşîn bikerê.”