Gulîstan Gulmuş

 

DÊRSIM - Dayîka Ayten Ozturk ke hetê JÎTEM'î ra amî remnayîş û qetilkerdiş Dîlîf Ozturk, çarçewaya "Hewteyê Vînîbîyayeyan" de waştişê xo edaletî ancî kerd û va, "Ma edalet wazenê, kamî kerd wa bêro cezakerdiş, ma do senî xo vîr ra bikerê?" 

 

Komela Heqê Merdiman (ÎHD) serra 1995ine de semedê cigêrayîşê vîndîbîyayeyan û semedê berpirsyarî bêrê vînayîş û bêrê muhakemekerdiş rojê 17 û 31ê gulane sey "Hewteyê Vînîbîyayeyan" bi name kerd. Na çarçewa de her serre hewteyê mabêne 17 û 31ê gulane de sey “Hewteyê Vînîbîyayeyan” yeno binamekerdiş. Merdimê vînîbîyayeyab her roja şemeyî aqûbetê vînîbîyayeyan persenê û wazenê ke kerdoxî bêrê vînayîş û cezakerdiş.

 

Ayten Ozturke 27ê temmuze 1992ine de hetê JÎTEM'î ra amî remnayîş û cenazeya aye 8ê tebaxe 1992ine de amî vînayîş, keye; 33 serrî yo edalet gêreno. Dayîka Ayten Ozturk Dîlîf Ozturk qalê cigêrayîşê edaletî yê 33 serran kerd. 

 

'Cayo ke ma ci gêrayî çinbî’

 

Dîlîf Ozturk ke qalê remnayîşê kênaya xo Ayten Ozturk kerd û va, "Akpazar de şuxilyayîne û verê hevalanê xo de mendêne. Wexto ke nê kênayan ra yewe şî betlane, yewo bi nameyê Yeşîl ame dewe, aye vindarna û remna. O wext tutêk aye vîneno. Dima ra venga tutî ame dayîş û tutî va, 'Di kesî wesayîtêk ra peya bî, fek û çimanê aye padayî û  esparê wesayîtî kerd.’ Nêwaştêne kênaya mi uca bişuxilîyo. Ma her ca gêrayî la ma kênaya mi nêdî.”

 

'Ma do senî xo vîr ra bikerê'

 

Dilif Ozturk, dîyar kerd nê kesî hetê dewlete ra yenê pawitiş û va, "Tewr peyîn dewêka Xerpêtî de kesêk şîne heywananê xo çêrnayîne, daristan de cenazeyêke vîna, kênaya mi binê herre de nimitîbî, tena destê aye teber de mendibî. Na xemgînî mi çin kerd. Ma şî dadgehe la mi tu netîce nêgirewt. Ma edalet wazenê. La edalet verê înan de ca girewt. Mi zaf dej ant û xeylê çî vîrê mi ra şîyê. Fotografê kênaya mi zî nêmojnenê mi û girewtê verê xo.”

 

Amed de 3 rojan amî îşkencekerdiş

 

Eşkerayîya çapemenîye yê semedê merdimê vînîbîyayeyan de ame neqlkerdiş ke Ayten Ozturk hetê Fermandarê JÎTEM'î Cem Ersever û endamê JÎTEM'î Abdulkadîr Aygan ra bi wesayitê Land-Roverê spî ke endamê JÎTEM'î yê bi nameyê Yeşîl û Mahmut Yildirim ra ameyê cakerdiş, ameya remnayîş û badê ke Amed de aye hîrê rojî îşkence kerdê û badê cû zî înfaz kerdê.

 

Dosya newe ra amî akerdiş 

 

13ê kanûna 2011ine de Komîsyonê Cigêrayîşê Kiştişê Kerdoxê nêdîyar yê Meclîsî babîyê Ayten Ozturk Hidir Ozturkî goşdarî kerd. Serekê Komîsyonî Ayhan Sefer Ustûn muracatê Serdozgerîya Komare ya Xarpêt û Dêrsimî da û dosya newe ra amî akerdiş.

 

Bêcezaverdayîş

 

Pêwa ke dosyaye de şahid, delîl û îtîraf bîbî zî 21ê êlula 2022ine de bi sebebê demvîyarte dosya bi bêcezaverdayîşî netîce bî. Keyeyê Ayten Ozturk serra 2013ine de muracatê Dadgeha Destûrê Bingehîn (AYM) kerdibî. Dadgeha Destûrê Bingehîn 21ê nîsana 2016ine de qerarê cipersayîşê bi tesîr ê çarçewaya heqê cuye ke goreyê madeyê 17ine ê Destûrê Bingehîn qerar ame dayîş ke heqê cuye ameyo binpaykerdiş. Semedê netîceyê binpaykerdişan werte ra wurzê nusxeyêk qerarê Serdozgerîya Komarê ya Xarpêtî rê amî şirawitiş. Labelê netîce sey xo mend û dewa semedê demvîyarte amî betalkerdiş û dosya bi bêcezaverdayîşî netîce bî.