Rozerîn Gultekîn

 

STENBOL - Cinîyan derheqê polîtîkayê şerê taybetî û vernîgirewtişê qetilkerdişê cinîyan de qisey kerd û vatî: “Çareserî bi rêxistinbîyayîşî mumkin o. Çareserî serra keyeyî nê, serra xoverdayîşî ya.”

 

Şîdetê cinîyan ser û tutan ser roj bi roje giran beno û goreyê çeteleyê aşma nîsane ya JINNEWS’î aşmêke de 34 cinî û 3 tutî ameyî qetilkerdiş. Eynî wextî de 14 cinî û 2 tutî zî bi şik dinyaya xo bedelnayî. No proseso ke aştî yeno munaqeşekerdiş û cinî merkezê prosesî de yê, îqtîdar binê nameyê ‘serra keyeyî’ de polîtîkayê şerê taybetî keno. Cinîyan derheqê hedefgirewtişê cinîyan û rayîrê çareserî de qisey kerd.

 

‘Xêrcê ma kesêk ma çin o’

 

Nîmet Arikan dîyar kerd ke qetilkerdişê cinîyan polîtîk o û va: “Qetilkerdişê cinîyan her roje zêde benê. Her roje cinî yenê qetilkerdiş. Ganî ma cinî xo bipawê. Sîstemo ke ma bipawo çin o. Xêrcê ma kesêk ma çin o. Ganî ma xo bi rêxistin bikerê û paştdayîş bipawê. Îqtîdar vano serra keyeyî. La ganî ma na serre bikerê serra xoverdayîşî. Ganî ma bêrê têhet û xo rêxistin bikerê.”

 

‘Çareserî rêxistinbîyayîş o’

 

Şevval Nûr dîyar kerd ke cinî her ca hedef yenê girewtiş û va: “Hemverê polîtîkayê şîdetî, siyasetê dewlete, do têkoşîn dewam bikero. Hemverê ‘serra keyeyî’ ganî ma ‘serra xoverdayîşî’ îlan bikerê. Ma cinîyê unîversîte xo wina rêxistin kenê. Çareserî kuçeyan de ya, çareserî rêxistinbîyayîşî ra derbaz bena.”

 

‘Ma hemverê sîstemî de yê’

 

Cinîya bi nameyê Sude ke peynameyê xo nêda dîyar kerd ke ê hetê cuyêka merkezê ci yê wazenê û va:  “Heta no şîdet dewlete dewam bikero, ma do kuçeyan de bê. Ma hemverê nê sîstemî de yê. Îqtîdar cinîyan ra terseno. Ma do hemverê sîstemî her wext meydanan de bê.”