Pelşîn Çetînkaya

 

ÊLIH - Hemsereka DEM Partî ya Êlihî Songul Korkmaz dîyar kerd ke hemverê waştişê aştîye yê şarê kurdî îqtîdar tecrîd de israr keno û vat, sebebê şerê ke yenê ciwîyayîş tecrîd o. Songul Korkmaz wina vat: “Semedo ke komel boyêke hîra bigîro, ganî tecrîd bêro wedaritiş, meseleya kurdî bi metodê aştî û demorkasî bêro çareserkerdiş.” 

 

Hemsereka Partîya Têduştî û Demokrasî (DEM Partî) ya Êlihî Songul Korkmaz derheqê waştişê aştîye yê kurdan û nêçareserîyê meselaya kurdî de qisey kerd.

 

‘Qeyûman vernê de cinîyan hedef girewt’

 

Songul Korkmaz sere de wina vat: “Seke şima zanê bi serran o polîtîkayê şerê taybetî dewre de yê. 2016 ra dest pêkerd û heta 2024ine polîtîka qeyûman ameye meşanayîş. 2016ine de wexto ke qeyûmî ameyî tayînkerdiş, vernê de destkewtişê cinîyan hedef girewtî. No zî şerê taybetî ra xoser nîyo. Tehemulê cinîyan nêkenê ke sîyaset de ca bigîrê û serkêşî bikerê. Ma 2019ine de zî eynî caardişî vîna. Nika eynî polîtîka yena kerdiş. No hêrişê hemverê hemserekî yo.”

 

‘Camêrdî tayînê mudurîyê polîtîkayê cinîyan kerdî’

 

Songul Korkmaz dîyar kerd ke ê şaredarîyêk zelal esas gênê û wina vat: “Ma şarê xo tewrê babete û bernameyanê xo kenê. Tewrê plansazî kenê. Ganî her sewîya de şar ca bigîro. Ma timî nê esas girewt. Ma şaredarîyêk zelal esas girewt. Eynî wextî de hesab dayîş zî kedêke pîl o. Nika ancî qeyûmî ameyî tayînkerdiş. La ma do her tim wayîrê destkewtişê xo û ercanê xo vejîyê.”

 

‘Sebebê probleman tecrîd o’

 

Songul Korkmaz tewr peyîn wina vat: “Sebebê pêro probleman, krîzan, şer, tecrîd o. Bi serran o Birêz Abdullah Ocalanî ser o tecrîdêk giran est o. Tewr peyîn parlamenter Omer Ocalan şî serdayîş. Birêz Ocalanî vat ke ez eşkena çarçewaya huqûqî û desturê bingehîn de problem çareser bikerî. Waştişê ma zî wedaritişê tecrîdî bî. La hema zî tecrîd de israr kenê. Semedê çareserîyêk aştîyane û demokratîk ganî tecrîdo giran wurzo. Semedo ke komel boyêke hîra bigîro, ganî tecrîd wurzo û aştî bêro.”