ÎHD 40 serre yo: Ma pey heqîqetî de yê

2026-07-17 15:48:15


	 

	 

	MERKEZÊ XEBERAN- Şubeyê Komeleya Heqanê Merdiman (ÎHD) ya Stenbolî, seba serrgêra xo ya 40. eşkerayîyêk daye. Sereka şubeyş Jîyan Tosun dîyar kerd ke ê seba aştî û azadîye têkoşînê xo de biisrar ê, her wext peyê heqîqetî de yê û vay: “Kesanê ke 40 serrî ra ver ÎHD’yî awan kerd, mojna ke pawitişê heqanê merdiman her hawayî mumkin o.”

	 

	Şubeyê Komeleya Heqanê Merdiman (ÎHD) ya Stenbolî, seba serrgêra xo ya 40. dinga Tramvayî ya Sultanahmetî de eşkerayîyêk daye. Na eşkerayî de dowîzê sey “Merdim bi heqanê xo merdim o”, “Ma heqîqet û edaletî wazenî”, “Nîjadperestîye sucê merdimîye yo” ameyê girewtiş û pankartê “Ma peyê heqîqetî de yê û seba aştî biisrar î” ame akerdiş. Îdarekarê ÎHD, DEM Partî, HDK, partîyanê sîyasîyan û zaf kesê bînî zî tewrê eşkerayî bîyî.

	 

	Eşkerayîye de metno hempar ame wendiş. Eşkerayîya hempar de wina ame vatiş: 

	 

	“40 serrî ra ver, wextêko ke heqê merdiman ameyêne binpaykerdiş, 98 merdimanê bêtersan pîya na komele 17ê temmuze 1986î de awan kerd. Tena nasê girewteyan nê, roşnvîrî, nuştoxî û rojnamegerî ameyî têhet. No tena awankerdişêk nêbi, vera ters û înkarî vinderetişo tewr bêters bi. ÎHD awankerdişê xo ra heta ewro her tim kîşta ê kesan de bi ke girewte bîyê, mexdûrê îşkenceyî bîyê û keyeyê ke nêzdîyê înan ameyê vîndîkerdiş. Nê têkoşînê giran de 23 embazê ÎHD’yî ameyî kiştiş, şubeyî ci ameyî bombakerdiş û serekê pêroyî yê verênî Akin Birdal û Husnu Ondul rastê hêrîşanê pîlan ameyî. Labelê vera nê pêro tedayan zî, têkoşînê ÎHD’yî bi serran o dewam keno.

	 

	ÎHD her wext vera şerî aştî pawita, çunke aştî bi xurtkerdişê demokrasî û edaletî yena ca. Ewro vernîya Tirkîya de firsendêko tarîxî est o, labelê seba aştîyêka domdare eşkerayîyê yewhetî bes nîyê û şar seba nê xerîtayêka rayîrî wazeno. Seba ke şar nê prosesî ra bawer bikero, ganî qerarê Mehkemaya Destûrê Bingeyên (AYM) û Mehkemaya Heqanê Merdiman a Ewropa (MHME) bêrê caardiş û qanûnê vera terorî bêrê bedilnayîşe. Ma seba aştî û azadîye do her tim biisrar bî û ma do her tim peyê heqîqetî de bî.”