Dayîkê Aştîye: Beşdarbîyayîşê mitîngî berpirsîyarî yo

2026-06-25 09:55:12


	 

	STENBOL - Înîsiyatîfê Dayîkanê Aştîye yê Stenbolî semedê “mîtîngê azadîye” ke do 28ê hezîrane Meydanê Azadîye de pê bêro veng dayî û vatî: “Mîtîng tena pêvînayîşêk nîyo, berpirsîyarîyêk tarîxî yo.”

	 

	Hetê Partîya Têduştî û Demokrasîyê Şaran (DEM Partî) ra bi armancê azadîya fîzîkî ya Rayberê Şarê Kurdî Abdullah Ocalanî 27-28ê hezîrane de Amed, Stenbol, Wan û Mersînî de do mitîng pê bêro. Mitîngê Stenbolî do Meydanê Azadîye ya qezaya Bagcilarî de pê bêro. Xebatanê semedê mitîngî her çar hetanê Stenbolî de dewam kenê. Semedê mitîngî têgêrayîşê cinîyan, kedkar, Dayîkê Aştîye, komîsyonê taxan û heme hetê komelî xebate domnenê.

	 

	Endamê Înîsiyatîfê Dayîkanê Aştîye yê Stenbolî derheqê mitîngo ke do 28ê hezîrane pê bêro qisey kerdî.

	 

	Ayten Toprak va ke lazim o heme şar a roje meydan de bê û va: “Semedê cuyêka azad, têduşt û adilane, lazim o ke her kes tewrê mitîngî bibo. Kurdî, tirkî ferq nêkeno. Lazim o ke her kes semedê aştî û azadîye mitîng de bibo. Lazim o ke bi hawayêk xurt tewrê mitîngî bibê.”

	 

	‘Mitîng tena pêvînayîşêk nîyo, semedê aştîye berpirsîyarî yo’

	 

	Gulsum Dag zî eşkera kerd ke mitîngê azadîye vengê qelebalixî nîyo, qêrînayîşê hembeşî yê dayîkan o û va: “Ma wazenê her wareyê cuye de vengê aştîye berz bikerê. Lazim o ke her kes bêro mitîng. Çimkî ameyoxêk azad û aram ne bi yew hetî, bi yewîye mumkin o. Mitîng tena pêvînayîşêk nîyo, semedê aştîye berpirsîyarî yo.”

	 

	‘Semedê aştîyêka manayine lazim o ke muxatab azad bibo’

	 

	Behiye Duman zî va ke semedê aştî û azadîye şarê kurdî bi israr game erzê la îqtîdar bêveng o û va: “Demokrasîyê raştîn bi îrade û samîmîyet lazim o biherikîyo. Nê demî ke vengê aştîye yeno berzkerdiş îqtîdar game nêerzeno. Aştî bi hawayêk yewhetî mumkin nîya. Lazim o ke ma zaf bibê. Azadîya fîzîkî ya serkêşîye muhîm a. O azad nêbo kes azad nêbeno. Semedê aştîyêka manayine lazim o ke muxatab azad bibo. Lazim o ke tepişteyê sîyasî azad bibê. Ma veng danê heme kesî ke 28ê hezîrane de mitîngê azadîye de cayê xo bigîrê.”