Îran cinîyê ke bêlaçike yê sey hacetê propaganda şuxilneno 

2026-05-21 15:30:30


	 

	MERKEZÊ XEBERAN - Medyaya dinya de ame vilakerdiş ke ê cinîyê bêserpişte yê ke medyaya Îranî de vejîyenê, bi ser îqtîdarî yê û sey hacetêk semedê propagandaya wedaritişê hîsê şarî yenê şuxilnayîş. Sewbîna neql bî ke zordarîyanê hêzê rejîmî yê cinîyanê bajarê cîyayê Rojhelatê Kurdistanî û Îranî ser o bi xurtî dewam kenê.

	 

	Goreyê xebera ROJNEWSyî medyaya dinya de derheqê fêlbazî û planê neweyê rejîmê Îranî yê semedê xapênayîş û çimboyaxkerdişê cimatî û rastîyê kuçeyan, raporêk vila kerd.

	 

	Medyaya dinya de ame vilakerdiş ke rejîmê Îranî bêmabêne dîmen û fotografê cinîyanê bê serpişt-laçikê ke rayîrşîyayîşê terefgiranê îqtîdarî yê hemverê şerê Îsraîl-Amerîka û Îranî de yenê, vila keno.

	 

	Rapor de dîyar bî ke no qonaxo ke Îran tîya de rewşêk şerî de yo, medyaya fermî ya bi îqtîdarê Îranî fotografanê cinîyanê bêhîcab kuçeyan û sey ke terefgirê rejîmê Îranî bibê nîşan dano. Dîyar bî ke vilakerdişê nê dîmenan demêk de yo ke Elî Xameneyî verê vetişê hîcabî “heram” bi name kerdibî û 47 serrê vîyarteyî de bi hezaran cinîyan semedê şiklê cilê xo rastê destbendkerdiş, îşkence, tepiştiş û qetilkerdişî ameyî.

	 

	Medyaya dinya va ke no vurîyayîşê medyaye tena tîyatroyêk propagandayî yo, çimkî bi rastî de zextê hêzê zordarê rejîmê Îranî cinîyanê bajarê cîyayê Rojhelatê Kurdistanî û Îranî ser o bi xurtî dewam keno û nêameyî vindarnayîş.

	 

	Sewbîna vatî ke cinîyan mîyanê xo de nameyê “mîlçikê hukmatî” dayê nê cinîyanê ke bi pere yan semedê armancê taybet vernîya kameran rolê cîya kay kenê. Heta raporî est ê ke vanê pêşnîyazê hîrê milyon tûmenanê cinîyan rê ameye kerdiş ke bêlaçike vernîya kameranê îqtîdarî sey terefgir biaso.

	 

	Erjê vatişî yo ke vernîya nê, babîyê Jîna Emînî neql kerdibî ke kênaya ci Jîna semedê çend mûyanê porê xo ameybî qetilkerdiş, la nika îqtîdar cinîyanê bêlaçike sey hacetê reklamê xo şuxilneno. Na rewşe, binpaykerdişê destkewtişanê merdimayîyê şorişê “Jin, Jiyan, Azadî” ke dimayê qetilkerdişê Jîna Emînîyî ya serra 2022ine de dest pêkerd mojneno.