Cuyêka bi feqîrî û têkoşînî dewam kena: Karkerê mewsimî

2026-05-18 09:38:39


	 

	Gulistan Gulmuş

	 

	RIHA - Karkerê mewsimî ke vera binpaykerdişê kede û feqîrîye têkoşîn danê, verbayê keda xo nêgînê û vera vatişanê hukmatî zî bihêrs ê.

	 

	Kurdistan û Tirkîya de krîzê ekonomî tesîrêkê pîl keno şarî ser. Ê ke tewr zaf tesîr benê karkerê mewsimî yê. Karkerê mewsimî vera problemê ekonomî têkoşîn danê û seba ke roja xo xelas bikerê xebitenê.

	 

	Dest bi karî kenê

	 

	Dewa Welatê Şêxa ya qezaya Xelîlîye ya Riha de, karkerê ke serê erdê daranê behîvan de xebitenê, dorê daran vaşanê nêbaşan ra pak kenê.

	 

	Karkerê mewsimî şefaq de rew wurzenê û esparê wesayîtî benê. Zafê înan tut ê. Karkerî tutanê xo zî xo reyde benê. Karkerê mewsimî pîya bi hewayê cemidnaye, bi tutanê xo reyde serê erdî de xebitenê. Cinîyê karkerî seba tutanê xo serê erdî de arayî amade kenê. Yew nê dayîkan ra Alîye Tatli ya.

	 

	Alîye Tatli derheqê xebate de qal kerd û eşkera kerd ke ê her karî kenê; fîstîqan, behîvan kom kenê, daranê înan pak kenê. Alîye Tatli wina va: “Ma şefaq de saet 4 û nîme de wurzenê. Ma saet 8 de dest bi karî kenê û heta saet 4 û nîmê şanî xebitenê.”

	 

	

	 

	‘Min zî waştêne cuye min weş bo’ 

	 

	Alîye Tatli wina dewam kerd: “Zehmetîyê karî zaf ê. Ma verbayê keda xo nêgînê. Rojaneyê ma tayn wextan hezar, tayn wextan zî 900 TL yo. Her çî vay o. Verê ke ez bizewicî ma karê xo kerdêne. Pesê ma estbî. Dima ke ez zewicîya ma wina dewam kerd. Karê ma zaf zehmet o. Ma binê tîjî de xebitenê. Ma verbayê keda xo nêgînê. Min zî waştêne cuye ma weş bo. Ganî dewlete ardim bido karkeran.”

	 

	Cinîya bi nameyê Necla Bogane zî wina ard ziwan: “Ez 36 serrî ya. Ma karkerê mewsimî yê. Ma erdan awe danê, karanê bînan kenê. Mi mekteb nêwaşt. Ma debara xo wina kenê. Ma dorê daran pak kenê. Tutê ma yê qîjî zî ma het de yê. Tutê ke ganî mekteb de bî, ma het de serê erdan de xebitenê. Ma serê herra xo de sey multecîyan ciwîyenê. Ma raste bêtêduştîye yenê. Ma heta şanî xebitenê labelê ma heqdestê xo nêşênê bigîrê.”