‘Heta dosyayê Gulistanan, Rojînan roşin nêbê do têkoşîn dewam bikero’ 

2026-04-25 09:59:23


	 

	ÎZMÎR - Zerrîwaza Mor Çati avûkate Ceren Akkaya va ke dosyayê Gulîstan Doku û Rojîn Kabaîşe ser o bêcezaverdayîş vurîyayo polîtîkayêk sîstematîkî û va ke semedo ke dosyayê merdişanê bigumananî de cipersayîşêk bi tesîrî nîno domnayîş, no zerrîya rayepêroyî de bêbawerîyêk pîl virazneno.

	 

	Dosyaya wendekara zanîngeha Munzûrî Gulîstan Dokuye ke 6 serrê verî Dêrsim de ameybî vînîkerdiş de 13ê nîsane de averşîyayîşê neweyî pê ameyî. Çarçeweya cipersayîşo ke mîyan de Walîyê Dêrsimî Tuncay Sonel zî est o de zaf kesî ameyî tepiştiş.

	 

	Sewbîna wendekara zanîngeha Yuzuncu Yilî Rojîn Kabaîşe ya 21 serrî 27ê êlule 2024ine de vînî bî û 18 rojî dima ra 15ê teşrîna verêne 2024ine de cenazeya aye ameye vînayîş. Cipersayîşê derheqê merdişê biguman ê Rojîn Kabaîşe de yew serrî yo qerarê nimitişî est o û raporê ATKyî de DNAyê di mêrdan ameyî tespîtkerdiş. Averşîyayîşê peyêne yê dosya de pê ame, raporê derheqê telefonê ke şirawitibî Îspanya bi. Rapor de vatî ke şîfreyê telefonî nêameyo akerdiş.

	 

	Zerrîwaza Mor Çati, avûkate Ceren Akkaya derheqê dosyaya Gulîstan Doku û Rojîn Kabaîşe de qisey kerd.

	 

	‘Serê dosyaye yeno girewtiş?’

	 

	Ceren Akkaya va ke dimayê 6 serrî “merdişê bigumanan” ra zêde îhtîmalê qetilkerdişê cinîye bi hawayêk xurt vejîya orte û ganî no wina bêro munaqeşekerdiş. Ceren Akkaya wina va: “Dosya bi serran bi têkoşînê keyeyî û rayepêroyî rojeve de mend. Persê ‘Gulîstan Doku ça de ya?’ bi israr ame persîyayîş. Nê prosesî de gumanê cîyayî estbî. Keyeyî destpêk ra va întîxar nîyo û têkoşînê xo domna. Ma ewro ewnîyenê cipersayîş ra, ma vînenê ke hewldayîşê keyeyî çiqas muhîm o zelal vînenê. Sewîyeya ewroyî de ma her çî vînenê. Dosya de gumanê bînî zî est ê. Prosesê huqûqî dewam keno. Gumanê wina tena dosyaya Gulîstan Doku de nîyê, dosyayê heme merdişanê bigumananê cinîyan de yenê dîyayîş.”

	 

	‘Cipersayîş ganî xo bisipêro sazîyan’

	 

	Ceren Akkaya dewam kerd û dîyar kerd ke berpirsîyarîyê esasî yê dewlete domnayîşê cipersayîşêk bi tesîr o û va ke xeylê dosyayî bi têkoşînê keyeyî, sazîyanê komelê sivîlî û çapemenîye rojeve de yenê verdayîş û aver şinê. Ceren Akkaya wina dewam kerd: “Ewro dosyaya Gulîstan Doku ancî ameye rojeve û no zaf çîyan nîşan dano. Sewbîna dosyaya Rojîn Kabaîşe. Keye vano ‘kênaya ma întîxar nêkerda’ û têkoşîn domnenê. Têkoşînê hemverê şîdetî bi nêzdîbîyayîşêk yewîye mumkin o. Ganî polîs, leşkerî, edlîye, komelê sivîlî bi koordinasyon xebate bikerê. Tîya de rolê rêxistinê komelê sivîlî, rêxistinê cinîyan, baroyan û çapemenîye krîtîk o.”

	 

	‘Bêcezaverdayîş cesaret dano gumanbaran’

	 

	Ceren Akkaya eşkera kerd ke Peymana Stenbolî muhîm a û va: “Feshkerdişê peymane bawerîya rayepêroyî şikna û cesaret da gumanbaran. Eke cipersayîşêk bi tesîrî çin bo û gumanbarî bêceza bêrê verdayîş no gumanbaran rê berêk akeno. Têgêrayîşê cinîyan Tirkîya de pêwa heme zordarîyan têkoşînê xo domnenê. Heta ke dosyayê Gulîstanan, Rojînan roşin nêbê do têkoşînê ma dewam bikero.”