Şukran Tugay: Dayîka mi semedê aştîye şî Anqara la amî qetilkerdiş 2025-10-08 10:59:33   Elfazî Toral   STENBOL - Kênaya dayîka aştî Meryem Bulute, Şukran Tugay va ke dayîka aye semedê aştî şîya Anqara la ameya qetilkerdiş û va: “Dayîka mi bi coşêk girdî şî Anqara la înan aye qetil kerd. Ez taqîbkera dewaya dayîka xo ya.”   Bi hezaran kesî semedê Mitîngê Kede, Demokrasî û Aştî ya 10ê teşrîna verênê ya 2015ine Tirkîya û Kurdistan ra şî Anqara. La mîtîng de 100 ra zêdeyêr kesî qetil bîyî û bi seyan kesî zî birîndar bîyî. Yew kesa ke qetil bî, Dayîka Aştî Meryem Bulute bî. Meryem Bulut ke semedê aştî vejîya rayîr rayîrê aştîye de ameya qetilkerdiş. Cenazeya Meryem Bulute 12ê teşrîna verênê de Êlih de goristanê Îkîztepeyî de kîşte tornê xo de amî definkerdiş.   Meryem Buluta ke Êlih de cîwîyayîne, dewe bi dewe gêra, erdî ser o xebatyayîne û ewnîyayîne tutanê xo ra. Dimayê darbeyê 12ê êlule koçê Îskenderunî kerd. 25 serrî tîya ciwîya. Dima ra keyeyê xo dir koçê Stenbolî kerd. Bi zordarîyanê dewlete ra rî bi rî mendî û hemverê nê dest bi têkoşînî kerd. Lajêk aye ko de û tornê aye zî Kobanê de dinyaya xo bedelnaye. Meryem Bulut Meydanê Galatasarayî û zaf waranê bînan de cebheyê verên de têkoşîn kerd. Semedê aştî bî qalxanê gane û reyan Şirnex de, reyan Licê de, reyan Cudî, Stenbolî û Anqara de bî. Bi hawayêko aktîf Dayîkanê Aştî de zî ca girewte.   Meryem Bulut qirkerdişê 10ê teşrîna verênê de Anqara de amî qetilkerdiş. Kênaya aye Şukran Tugay serrgêra qetilkerdişî de qalê dayîka xo kerd.     ‘Dayîka mi semedê her kesî heval bî’   Şukran Tugay qalê dayîka xo wina kerd: “Dayîka mi semedê ke tutanê xo rê biewno bi serran xebatîya. Tutê aye wexto ke bî gird, semedê şarê xo xebatîya. Dimayê ke birayê mi şi ko, dayîka mi dest bi têkoşînî kerd. Tena semedê tutanê xo nê, semedê temamê tutanê şarê xo têkoşîn kerd. Çî destê aye ra ame kerd. Hemverê şerê Licê de bî qalxanê gane. 40 rojan Licê de mende û dima ra amî Anqara. Ma şî gorê xala xo ser. Dayîka mi o wext va ‘ez Anqara ra bêrî ez do şîrî verê Dayîka Sakîne û tewrê qalxanê gane biba.’ Dayîka mi keye de nêniştêne ro. Heta Kobanê zî şî. Dayîka mi her tim va ez do hemverê şerî de têkoşîn bikerî. Tesîrê dayîka mi mi ser de zaf girdî bî. Têkoşînê aye rayîrê ma roşn keno. Dayîka mi semedê her kesî rêheval bî. Cinîyek bi edalet bî. Her kesî ra aye hes kerd, hemverê aye de rêzdar bî. Hevalê aye yê Licê vatî ke sey ma 40 serrî yo aye şinasnenê.”   ‘Bi coş û hêvî şî Anqara’   Şukran Tugay va ke dayîka aye bi serran semedê aştî têkoşîn kerda û wina va: “Semedê mîtîngê aştî şî Anqara û uca de amî qetilkerdiş. Dayîka mi têkoşînê Dayîkanê Aştî de ca girewte. Çalakîyanê semedê aştî de ca girewte. Va ez semedê aştî şina Anqara. Şahidanê qirkerdişî wexto ke a roje qal kenê, vanê ke ma hîs kerd ke çîyêk do bibo. Çike yew polîs zî ware de çin bîyo. Bi hemkarî kesê ke aştî waştêne qetil kerdî.”   ‘Ma do taqîbkerê dewa bê’   Şukran Tugay va ke aye têkoşînê ‘aştîye’ yê dayîka xo rê wayîr vejîyaya û va: “Rayîrê înan rayîrê ma yo. Ma aştî wazenê. La heta nika kam aştî waşt qetil kerdî. 10 serrî ma dewaya xo kenê. Roniştişan de vanê ma tedbîrî girewtê. La ma bawer nêkenê. Çike tedbîrî nêgirewtî. Şahidî qal kenê. Heta ez biba ez do na dewa ra fek vera nêda. Ez do heta peynî têkoşînê xo dewam bikera.”